3164/2023-2024

Dated Thenzawl, the 22nd December, 2023: Vawiin khan Thenzawl Handloom Complex-ah National Handloom Development Programme (NHDP) hnuaia Puantahna In sak tanpuina a dawngtute hnena hlanna neih a ni a. Chief Minister Pu Lalduhoma chuan khuallian niin a hmanpui a, Pu F. Rodingliana, Minister of State, Commerce & Industries, etc., chu khualzahawm an ni.

He hunah hian Chief Minister chuan, Pu Mahatma Gandhi ten India ram hi politics a mahnia inrelbawlpui ringawt a tum lova, ei leh barah pawh mahnia ding thei nihpui tumin amah ngeiin Hmui a kaia, mipuite a zirtir thin. Chumi zirtirna kal zelah chuan a ni awm e, keini pawhin kum 1977 atang khan Thenzawlah puan kan la tah zel a, India ram pum hriat kan hlawh tawh a, hma lam kan pan zel ang. Vawiina in pawisa dawn te hi in dawn chhan ang taka hmang turin ka duh che u a, sawrkarin a endik zui zel dawn a, tam tak ni lo mah se dik taka in hman chuan in tangkaipui ngei ang tih ka ring. In hman dik loh avanga a hnu zela tanpuina in dawng zui thei ta lo a nih chuan in mawhphurhnaah kan ngai dawn a ni, a ti. Hetiang scheme hi Lungrangah pawh kalpui a ni a, puantahna in sak chauh ni lo thil dang pawh he scheme hian a keng nual a ni, a ti. Mipui hnena sawrkar tanpuina sum thleng tur, official lama tangkhang hlen ta a awm thin nia an hriat thu sawiin kan sawrkar tharah hi chuan chutiang chu a awm tawh tur a ni lova, chutiang tih ching official te chuan hremna an pumpelh lovang. Mipuite hnena thleng tur chi chu za ah za an kutah a lut tur a ni, a ti.

Chief Minister Pu Lalduhom hian Thenzawlah hian Puan banna khawl a mamawh apiangte hman theih turin a din a, in luah man leh bill dang te a tum sak a ni. Tunah hian Thenzawlah hian puantahna khawl 2400 vel a awm mek a, kumtin Rs. 103 lac vel an thawk chhuak thin.

Khualzahawm Pu F. Rodingliana pawhin thusawiin, vawiina sum leh pai kan inpek hi Mizoram sawrkarin a pek a ni lova, central sawrkarin puantahtu, taima taka thawk thin, puantahna in nei silote tana a rawn pek a ni. A dawngtuten dik taka in hman kan phut a, kan enzui dawn che u a ni, a ti. Kan sawrkarin Bana Kaih Policy a kalpui tur pawh hi za zel 42 chu Industry lam hawi a ni dawn a, hnathawktute thawhchhuah hi mumal taka bawhzuia hmasawnpui a tum hle a ni, a ti.

Tanpuina hi NHDP Financial Assistance for outside Cluster (Construction of Individual Workshed) hi pek an ni a. Cheng nuaih khat singhnih (Rs. 120000) theuh pek niin, an in sak zau zawng tu hi 25 sq meter a ni. Tanpuina hi Bank Cheque a hlan niin Pi Liansailovi, Chief Minister Pu Lalduhoma nupui chuan a dawngtute hnenah a hlan a ni.

He hun hi Pu PC Lalvuana, Joint Director, Handloom, Textiles & Handicraft, Commerce & Industries in a kaihruai a, Pi Florence Zotluangpuii, Director, Commerce & Industries chuan tanpuina an sem chhan leh an hmalak dan sawifiahna a nei a, a dawngtu turte an thlan fimkhur thu leh a dawng tlak te ngei chauh an thlanchhuah dan a tarlang a. He Scheme hnuaia training hrang hrang an lo pek tawh dan te pawh a tarlang bawk.

Pu David Lalthantluanga, DC, Serchhip, Pu MS Dawngkima, SP Serchhip leh official pawimawhten an telpui a ni.