Vawiin khan Chief Minister Pu Lal Thanhawla hovin CM Conference Hall-ah NLUP Kutpui Organizing Committee  thukhawmin “NLUP Kutpui (NLUP Fair-cum-Exhibition)” neih tur atana inpuahchahna kal mek chi hrang hrang te an thlirho.

Meeting kaihruaitu Chief Minister Pu Lal Thanhawla chuan NLUP chu mirethei lamtang programme anih bakah kawng hrang hranga Mizoram tihhmasawnna programme anih tel bawk avangin a pawimawh em em a, Line Department hrang hrangte leh NLUP beneficiary thawk tha te zarah a hlawhtlinna kan tel mek zel ani a ti a, India rama Gross State Domestic Product (GSDP) tha ber State pali zinga kan tel theihna chhan pawimawh tak pakhat chu NLUP vang ani a ti bawk. Heng te anih mek laia NLUP hlawhtlinna leh rahchhuah pholanna tur “NLUP Kutpui” buatsaih ani tur chu thil lawmawm tak anih thu sawiin kan sum neihin a daih chhung chuan NLUP hi kalpui zel ani ang a ti a, Khawvelin a buaipui leh hmalakna pawimawh a a neih tuihna kangchat mek siamthatna te, khawvel lum chho zel atana mamawh ramngaw tha siamna, nungcha humhalh, ei leh bar intodelhna leh thil pawimawh chi hrang hrang NLUP hian a keng tel vek tih an hriat avangin ram pawn hmun hrang hrang atang mithiam ten an rawn ngaihven a, kan sawm ni miah lovin UNO hial pawh a rawn lut a ni a ti a, “NLUP Kutpui” hlawhtling taka neih anih theihnan theihtawp chhuah turin member kalkhawmte a chah a ni.

NLUP kutpui hi kumin March thla chawhma lama neih tura ruahman a ni a, a neihna hmun tur pawh uluk taka ngaihtuah turin sub-committee din anih bakah he Kutpui atana kawng hrang hranga hma la tur sub-committee 11 din ani bawk a, NLUP Line Department hrang hrang ten an inpuahchah dan leh ruahmanna an neih te report pe in uluk taka sawiho a ni a, NLUP Line Department 10 in NLUP kaltlanga an hmalakna an phochhuah dawn bakah beneficiary hlawhtlingte hmalakna phochhuah tum a ni a, NLUP beneficiary te tharchhuah chi hrang hrang mipuite lei theih tura chhawp chhuah tum niin NLUP kaltlang a tharchhuah chi hrang hrangte zau zawka hralhna tur “Market” ngaihtuah ani bawk ang. He Kutpui hi Mizoram bakah India ram pum a “live” a pekchhuah turin ruahmanna siam a ni.

Vawiin meeting-ah hian NIB Chairman Pu JH Rothuama, NIB Vice-Chairman Pu PL Thanga bakah NLUP Kutpui Organising Committee member te an tel tha hle a ni.