Chief Minister Pu Lal Thanhawla hovin vawiin khan Vanapa Hall-ah NLUP Revitalization Programme hman a ni.

Chief Minister chuan sorkar flagship programme NLUP in kum 5 hmel a hmu ta chu a enkawltu line department a thawktute, thahnemngai taka dawngtu thawktute chungah leh kal sual min hlauhpuitute’n thurawn tha tak tak an peknaah lawmthu sawiin, chhunzawm zel theih a ni tur chu a lawmawm hle a ni a ti a. NLUP chhunzawmna turah kawng tam taka hma thar lak tum anih dawn avangin intuaithar lehna nen kalphung thara kal anih tur thu a sawi a. NLUP sawichhetute leh dodaltuten hekna belhchian dawlloa central sorkarah min hek mahse, thudik hrilhfiah an nih hnu ah a that lohna an hmuh loh avangin chhunzawmna tur sum kan dil aia tam min rawn pe a ni a ti a. Hekna avang hian mi tam takin an rawn ngaihven phah a ni tiin, thil awmdan hrilhfiah an ni chuan NLUP hek a ni chu mak an ti hle a ni a ti.

Chief Minister chuan oil palm hriak her chhuah nan Godrej Company in Mill lian tak an rawn din thu sawiin, tunah hian Tata Trust Fund te nen thawhho tum mek a ni a ti a. NLUP dawngtuten an tharchhuahte hralhna turin leh hamthatna an hmuh theihnan Market Infrastructure Development ngaihtuah mek a nih thu leh chumi atan regulate market te, wholesale market te, terminal market te leh retail market te ngaihtuah mek a ni a ti a. Processing lam te pawh a pawimawhna hriain, mamawh ang zela hmalak tum a ni a ti. Project thar leh hlawk zawka kalpuina turin hma thar ruahman a ni a ti a. Hemi atan hian International Cooperation Fund atangin US Dollar nuai 4.9 beisei a ni a ti. NLUP hlawhtlinna tur hi za a za theih loh mahse 60% vel tal chu a hlawhtlin beiseiawm a ni a ti.

Chief Minister chuan NLUP dawngtu kalkhawmte chu Pathianin NLUP hmang hian retheihna ata khaichhuah a duh a ni tih an hriat a tul a ni a ti a. Chuvangin tihtakzeta rinawmna leh taimakna nen kalpui turin a chah nawn a ni.NLUP 1st leh 2nd Phase chhungin a dawngtu thlanchhuah mi 6000 chuangin an tih that duh loh avanga cheng nuai 168 sen thlawn anih thu sawiin, a vanduai thlakin a pawi hle a ni a ti a. Pek zawm tlak loh leh chhuhsak ngai nihte hi a mualpho thlakin a pawi thin hle a ni a ti. Chuvangin kan hnathawhna theuh hi Pathianin a rawngbawl tura min dahna a ni a, rinawmna, dikna, taimakna leh Pathian tihna nung nen tui taka thawk tur kan ni a ti.

NLUP hnuaiah hian NLUP hna thawk theilo, mahse tanpui ngai bawk si mi chhumchhiate tan pawisa fai tanpuina Chief Minister Special Scheme atangin Rs.20,000/- pek thin a ni a, vawiinah pawh mi chhumchhia pahnihte hnenah he tanpuina hi Chief Minister hian a hlan bawk a ni.

NLUP Nodal Minister Pu R.Lalzirliana chuan NLUP vanga tlangram lo neih tlahniam ringawt pawh hi lawmna tur pakhat a ni a ti a. NLUP in kum 5 chhunga hmasawnna a hmuh hi hmasawnna ngialnghet a ni tiin, sum hmuh tur pawh hmuh kim a ni tawh a ni a ti. Hlawhtlinna 100% in hmulo mah ila mi harsa zawkte hnena tanpuina kan pe hi a lawmawm hrim hrim a ni a ti a. NLUP hi malsawmna thuah tam tak thlentu a ni a ti.

Rev. Chanchinmawia, Member, NLUP Apex Board chuan sorkar hnathawk zingah Ministry thawhpui duhlo leh thawhpui thiamlo an tam a ni a ti a. Hetiang mite hi hmai zahawm tak tak, kohhranah pawh nihna nei an ni duh khawp a ti a. NLUP hman dik loh thu ah a petu mawh a nilo tiin, thatpui tumlo tam tak an awm a ni a ti a. Mi lungawite tan hlawkna a ni a ti. Pu Lal Thanhawla chu thusawi thiamlo, mahse thil tih thiam tak a ni tiin, Chief Minister thusawi thiamlo, thil tih thiam bawk silo kan nei ang tih a hlauawm hle a ni a ti.

Inkhawm kaihruaitu Pu H.Liansailova, Vice Chairman, Planning Board chuan Mizoram chu tribal economy atangin agrarian economy ah chhoin, tunah hian NLUP vangin subsistence economy ah kan awm mek a, kan la hmabak chu market economy a ni a ti.

NLUP kalpui anih atang khan kum 2013-14 chhungin tlangram lo neih 20.75% in a tlahniam a, hetih lai hian Tlangram loneitu chhungkaw (jhumia family) pawh 14% in a tlahniam bawk a. Hemi kum chhung veka buh thar tam zatah NLUP in 9% a thawh a, leilet awm zawng zawngah NLUP in 20.76% a thawh bawk a ni