2777/2025-2026

Aizawl the 29th December 2025: Vawiin khan CM Conference Hall-ah Chief Minister Pu Lalduhoma kaihhruaiin Mizoram Resource Mobilisation Committee te chu an thukhawm a, an hmalaknate an sawiho.

Ni 23 April 2024 a MRMC in an lo rel tawh, Mizoram sorkar doctor ten Non-Practicing Allowance (NPA) la chunga private practice an awm chuan tihtawp ni se tia thutlukna an lo siam tawh bawhzuina an thlir a. Health & Family Welfare Department-in report a thehluh danin, sorkar doctor 452 an awm mek a, an zinga 347 ten NPA an la a, doctor 105 ten an la lova, NPA la chunga private practice an awm lo a ni.

Mizoram Health Services Rules, 2009 behchhana Mizoram Gazette Notification 18th February 2010 leh 18 December 2024 Amendment chuan sorkar doctor (non clinical) private practice te chu NPA an lak a khap a, private practice turte pawhin phalna an lak a ngai a. Meeting hian a bawhzui zel dan tur an duang a ni.

Aizawl khawpui chhunga sumdawnna kalpuitu GST Registration nei thei tura ngaih, registration la nei si lo te zawn chhuah hna Aizawl City Local Council Association nena tang tlanga thawh an rel a. Taxation Department lamin an bawh zui ang.

Taxation Official-ten raid/verification an neih changa invenna atana silai (Arms) eng emaw kawl an dilna chu central sorkar leh state dangte tih dan angin, a tul hunah home department nena thawh dun dan lo ngaihtuah thin se, an ti.

MRMC hian Administrative Reform Commission 2019 in file-in officer dawhkan pali chauh kal tlang tura rawtna an lo siam tawh chu tlema her rem deuhin department thenkhata enchhin turin DP & AR lama thlen an rel a. An ruahman dan chuan Department pakhatah Under Secretary a awm chuan Deputy Secretary awm lo se, Deputy Secretary zawk a awm chuan Under Secretary awm lo se, tih leh; Department pakhatah Joint Secretary a awm chuan Addl. Secretary awm lo se, Addl. Secretary zawk a awm a tul chuan Joint Secretary awm lo se, tih a ni a. A kalpui chhinna tur department erawh chu DP & AR lamin an ruahman ang.

Importer & Exporter Licence holder ten KMMTTP kaltlanga bungraw che vela chhiah pek a nih leh nih loh endik hna thawh dan tur rawtna an thlen chu zirchian ni se, an tih bakah Secretariat-a e-office kalpui a nih hnua a nghawngte zirchian ni se, an ti bawk.

Meetingah hian Pu Haukhuma Hauzel, IAS (rtd), Vice Chairman, Mizoram Resource Mobilisation Committee leh member dangte an tel a ni.