Chite lui humhalh tura hmalakna te sawihovin vawiin chawhnu khan Chief Minister Pu Lal Thanhawla kaihhruaiin CM Conference Room-ah Special Meeting neih a ni a. He hunah hian Higher Education Minister Pu R. Romawia, Finance Minister Pu Lalsawta, PWD Minister Pu Lal Thanzara, Deputy Speaker Pu R. Lalrinawma, Agriculture Minister Pu KS Thanga, ZOHANDCO Chairman Pu R. Vanlalvena bakah mi sawm bikte dang leh Save Chite Executive Committee Member-te an tel a ni.

Chief Minister chuan Chite Lui humhalh tura hmalakna siam a ni chu lawmawm a tih thu sawiin, he hmalakna atan mi pawimawh tak tak MLA, an bial chhung Chite Lui in a tan tlang zawng zawngte chu vawiin thukhawmah hian tel tura sawm an nih thu a tarlang a. Chief Minister chuan Aizawl leh a chhehvelah mipui tan hawikhawthawnna tur hmun remchang leh nuam a tlem thu sawiin, a awm chhunah pawh a mawina, 'natural beauty' tichhe zawnga hma lak a ni fo chu pawi a tih thu a sawi a. Chite Lui leh hmun dang dang pawh humhalh awm tak tak a awm nual thu sawiin, hemi atan hian mawhphurna chu mitin kut a nih thu a sawi a. Mimal hlawkna chauh um hian hmasawnna a tih thuanawp thin thu a tarlang bawk.

Save Chite Lui atan Special Meeting thukhawm hian Coordination Committee hnuaia hmalakna lo awm tawhte thlirho niin, hmalak zel dan tur te sawiho a ni a. Leivung leh bawlhhlawh paih avanga tui a bawlhhlawh bakah lui kuang a zim phah tawh zia te sawilan niin, khapna dan siam a tul thu tarlan a nih bakah Chite Lui dinhmun hi mipuiin zau zawka an hriat theih nan inhrilhhriatna tha tak neih a tul zia te sawi a ni a. Save

Chite Lui hnuaiah hian Baseline Survey neih tawh a ni a. Heng bakah hian University of Minnesota leh Mississippi Water Management Agency leh Mizoram University te pawhin survey an lo nei tawh a. NSS hnatlang pui vawi khat lo buatsaih tawh niin, unit eng emaw zah in hnatlang neih leh an tum thu tarlan a ni a. Chite Lui mai bakah a zawmtu veng hrang hrang atanga lung lut luite te chu ngaihpawimawh tel a tul thu sawi a ni bawk a. Chite Lui hi chimral mai theih dinhmunah a din avangin a mipuiah inhrilhhriatna tha zawk a awm theih nan drama, photography exhibition leh kawng dang danga hmalak tum a nih thu sawi niin, INTACH nen thawhhona zarah zirlai naupang ten field visit a Chite Lui an tlawh theih nan hmalakna siam a nih thu tarlan a ni bawk.

Vawiin meeting-ah hian Chief Secretary Pu Lalmalsawma, Save Chite Lui Coordination Committee Chairman ni bawk bakah EF&CC, UD&PA, PWD, PHED, AMC leh DIPR atangin Secretary leh Officer te bakah Save Chite Lui Executive Committee Member-te an tel a ni.