Chief Minister Pu Lal Thanhawla hovin Chief Secretary leh Secretary ten vawiin khan New Secretariat Complex-a Chief Secretary Conference Room-ah meeting an nei.

Chief Minister chuan sorkarin kum 3 chhung dawn hmel alo hmu ta a ; hemi chhung hian sorkar hna kalphungah te, hun vawn dik thu ah te leh mahni inthununa kawngah nasa taka hmasawnna hmuh tur a awm chu thil lawmawm tak a ni a ti a. Eirukna kawngah Minister te mai nilo, officer tumah hminghliauna nei an awmlo chu a chhuanawm hle a ni a ti. Chuvangin kan hnathawhte inenfiah a, thlirlet nan hmang turin senior officers te chu a sawm a ni.

Chief Minister chuan hmasawnna thawhna kawngah compensation in hna a tih khawtlai leh a tih khaihlak thin avangin ram kan neih dan land tenure system- hi ennawn a ngai hle a ni a ti a. Sum lama inrelbawlna tha leh felfai sorkarin a mamawh thu a sawilang bawk a. Department thenkhat inhretawnlo leh inpawhlo an awm hian harsatna a awm thin thu sawiin, kan tih tur theuh hi ti ila chuan hmasawnna tam tak kan hmu tur a ni a ti a. Secretary te chu thingtlangah te kal a, mipuite rilru leh sorkar programme kallaite a hmunah hriat tum thin tura chahin, mipuite nen inpawh tawna, langtlang taka programme kalpui hi kan tih tur a ni a ti. Sorkar hnathawkte chu an hna-a tui a pawimawh ber a ni tiin, kan naute pawh chutiang chuan kan fuih tur a ni a ti. Kan hnuai ami te tan role model nih i tum ang u tiin sorkar hotu lian te chu a sawm a ni.

Mizorama Lokayukta nei turin Accountant General in hma a lak mek thu Chief Minister hian a sawi bawk a. PRISM in an Election Manifesto an lepse na chu a tha thawkhata a hriat thu a sawi a. An manifesto thenkhatte chu ti puitling turin hun duh tak tak te pawh an awm a ni a ti. NLUP hnathawh endiknate leh enfiahna neih thin chu duhthu a sam lo a ni a ti.

Chief Secretary pawh in thusawina nei in file kal muang lutuk thin chu a ngaihmawh thu a sawi a.Secretary te chu a mimal ang pawha tuichilh thin turin a chah a. Hmasawnna tichak tur hian district administration tihchak a tul a ni a ti.

Secretary 2 remchanglo tih loh, an kal kim hle a ni.