Chief Minister Pu Lal Thanhawla kaihhruaina hnuaiah nimin khan Chief Minister Office’s Conference Hall-ah State Level Committee on Green Mizoram chu thukhawmin Green Mizoram Day hman dan tur an rel.

 

 

Chief Minister Pu Lal Thanhawla chuan thuhma tlem sawiin, ramngaw kan tihchereu nasatzia leh nungchate chunga  kan nun a rawnzia thlir hian, kan ram hi thlalerah kam siam mek a ni a ti a. Hetiang anih  avang hian kan luituite pawh a kang sawt nasa hle tawh a, sangha awm chhunte pawh tur hmangin kan la hrai duh zel hi a pawi hle a ni a ti. Chuvangin chhuan lokal leh zel turte tan chenna tlaka kan siam hi kan mawh a ni a ti. Kan thing phunte hi a puitlin ngei theih nan duat taka kan  enkawl chhoh hi kan tih tur a ni a; savate an lokir leh theih nan sava tlan tur rah nei chi thing tiak phun tul a tih thu a sawi bawk a ni.

Committee chuan kumina Green Mizoram Day ni atan 16th June 2009 (Thawhlehni) a ruat a. He ni hi District dang zawngah pawh Green Mizoram Day an hman ni tur a ni bawk dawn a ni. A hmanna hmun (ceremonial tree planting) atan Falkawna Referral Hospital ruat a ni bawk a, a hunah chawhma dar 10:30 A.M. a ni ang.

Thingtiak phun tura ruahmante chu chi thum anih tur thu committee chu hriattir a ni a. Chungte chu par chi (flowering tree), rah chi (fruit bearing) leh kumtluana hring (evergreen) te an ni ang. He ni denchhena thingtiak phun tur hi 1200 vel a ni anga, Melthum atanga Falkawn inkar kawngpui dung sirah phun tum a ni.

Kum kalta te a kan hman tawhah, thingtiak phunte dam khawchhuak a tlem thin avangin, committee memberte chuan a enkawl chhoh hna a pawimawhzia uar takin an sawi tlang a. Hemi lamah hian mipuite hnenah Chanchinbute (media) kaltlanga zirtirna thehdarh thin nise an ti bawk a ni. Kum 10 kalta chhunga thingtiak phun zawng zawng chu 13,58,804 a ni a, enkawlzui an nih loh avangin puitling ta erawh a tam lo tih report a ni bawk.

Committee ah hian memberte an kal kim hle a ni.