Zirna In-a ruihhlo hmansual thleng thei dona leh a venna tura hma la tura din - State Level Committee on Prevention of Drug Abuse in Educational Institutions chu vawiin khan Education department bultumin Chief Minister Pu Lal Thanhawla hoVin a office cabinet room-ah an thukhawm.

Chief Minister chuan thuhma sawiin, meeting chu meeting pawimawh berte zinga mi a ni, a ti a. Kan ram leh thalaite hi ruihhlo hmansualna in a run nasat tawh lutuk avangin a do hna beihpui thlak a hun tawh a ni, a ti a. Drugs hmansual leh tawlhruk kawngah Mizote kan hmingchhe nasa a, state ralmuang kan nih avangin silai leh drugs tawlhrukna remchavgah midangte pawhin an hmang nasa a, chuvangin Sorkar, pawl hrang hrang leh Kohhran te kan tan tlan a pawimawh hle a ni, a ti. Zirna In-a drugs hmansual chungchang sawiho tur kan ni a, school bikah hian vaihlo dona kawngah school chhehvel metre 100 huam chhunga vaihlo leh a kaihhnawih siamte reng reng zawrh khap tlat te hi tha taka zawm a ni em tihte kan en fo a ngai a ni, a ti a. Drugs hi phalna neilo chuan kawl phal a nih loh angin, zirtirtute chuan rinhlelh thilah chuan an zirlai naupangte an check (random checking) a thiang a ni, Chief Minister chuan a ti.

Meeting-ah hian sawiho tur engemawzah chhawpchhuah a ni a. Drugs hmansual chungchang chu buaipui ber anih avangin, a venna leh a hremna chu Cosmetics & Drugs Control Act leh Assam Drugs Control Act, Mizoramin a mamawh ang zela siam rem chhoh chu hman mek a nih thu tarlan a ni a. Dan anga drugs kaihhnawiha man te chu hremna a nat tawk theih loh avangin, Mizo ten khawtlang tihphunga kan neih thinte hi dan kalh lova hman ve a tulna a awm thin a ni tih member thenkhatte chuan an sawi a. School thenkhata parents meet an buatsaih thin te hi zirlai naupangte enkawlna kawngah thil tangkai tak anih thu tarlan a ni bawk a. Zirlai naupang ten drugs hmansualna laka an fihlim theihna kawngah damdawi hmansual hlauhawmzia mahni in lam atanga nu le pa ten zirtirna an pek a pawimawhziate, kohhran leh khawtlangin tih tur a neihte leh MLTP Act chungchangte sawiho a ni a. Hetih lai hian drugs hmansual nasat ber proxyvon leh parvon spas te chu June ni 13, 2013 khan central sorkarin siam chhuah a khap tak thu tarlan a ni. Hengte bakah hian Programme kalpui mek lai Adolescence Education Programme (AEP) te, Key Resource Persons te, Nodal Teacher leh Peer educator te tha leh zuala an kal chhoh na tur te sawi ho a ni a. Educationa thawkte tan leh media te, tlawmngai pawlte leh nu leh pa te tan inzirtirna siam sak te sawiho a ni.

Zirna In-a ruihhlo hmansualna laka hmalatu tur atan department hrang hrang Education, Home, Health & Family Welfare, Excise leh Social Welfare te ruat an ni a, CYMA leh sawm bik an awm bawk. Meetingah hian Home Minister Pu R.Lalzirliana, Education Minister Pu Lalsawta, Excise Minister Pu JH Rothuama, Health Minister Pu Lalrinliana Sailo leh Social Welfare Minister Pu P.C.Lalthanliana te an tel a, an ni bakah hian sorkar official pawimawhte leh sawm bik leh CYMA President te an tel bawk a ni.