Vawiin khan Mizoram State Level Committee on Fire Prevention chu an Chairman, Chief Minister Pu Lal Thanhawla kaihhruainain Chief Minister Office’s conference room ah an thukhawm.

Meeting ah hian thu ngaihtuah tur agenda 7 chhawpchhuah a ni a. Chung zingah chuan Fire Prevention Week chu kumin atan tun thla February ni 21 atanga ni 27, 2014 nise, a hawnna ni ah February ni 21, 2014 Legislative Assembly Annexe Conference Hallah chawhnu dar 1:30 P.M. ah Chief Minister in hawng se tih an rel a. Kum danga lo tih tawh thin angin kuminah pawh March ni 15aia tlai lovah lo hal vek nise, hetah hian Lengpui leh a chhehvel khuaahte tlai dar 4 hmaa hal lo turin Aizawl, Kolasib leh Mamit District Bawrhsap ten V/C tin hnenah hriattirna pe se tih an rel bawk a. Kum 2013 chhunga lo hal chungchanga ram tikang leh sorkar thupek zawmlo te laka hmalak dante tarlan a ni a. Kum 2012 a sorkar thupek zawmlo khua 142 an awm laiin kum 2013ah khaw 19 a a tlakhniam thu tarlan a ni. Sorkar thuchhuah zawmlote laka V/C ten mimal chunga hma an lakdante sawichhuah a ni bawk a. DC tinte chu Cr. PC section 144 tlawhchhana thupek siama dan bawhchhiate chu CrPC 188na hmanga hrem theih an nih thute tlangaupui se tih an rel bawk a.LAD lamin V/C tinte hnenah lo leh huan vat te hming fel taka vawng turin khauh zawkin hriattir nise tih an remti bawk.

Heng bakah hian kangmei chhuak thei ven that hna thawk tha bik district leh village levela lawmman siam leh nise tiin, 1st in Rs.50,000/-leh certificate, 2nd in Rs.30,000/- leh certificate leh 3rd in Rs.20,000/- leh certificate siam a, heng lawmman dawng thei district leh village te hnenah nakum 2015 a Fire Prevention Week hawn niah sem nise tih a ni bawk a.Kangmei chhuak thei laka mitinte fimkhur a pawimawhzia kan hriat tlan theihna turin awareness campaign uar thei ang bera kalpui a, TV lamah te Talk Show te neih nise tiin an rel bawk a ni.