224/2022-2023

Aizawl the 21st April, 2022 : Chief Minister Pu Zoramthanga hovin vawiin khan CM Cabinet Meeting room-ah Zemabawk a Super Specialty Cancer and Research Centre din tur chungchanga ngaihtuah tur pawimawh te ngaihtuah a sawiho a ni. Health & Family Welfare Minister Dr. R. Lalthangliana leh Health & Family Welfare Development Board Vice-Chairman Dr. ZR Thiamsange te an tel a ni.

Chief Minister chuan India state zinga cancer vei tam ber nihna kan chang chu thil pawi tak, thlak danglam thuai ngai a nih thu a sawi a. Cancer laka fihlim theih nan inzirtirna leh thil dang danga hmalak rualin damlo enkawlna tha mahni kawtkaia pan mai tur kan din thuai hi a pawimawh tak zet a ni, a ti a. Super Specialty hospital chu kan mamawh hmasak ber te zing ami a nih avangin a tul ang te bawhzui zel a, a sak han tan thuai turin meeting a telte chu a chah a ni.

Health Minister chuan Mizoram mipui mamawh em em hun engemawchen ruahmanna lo awm tawh chu tun tuma Chief Minister thahnemngaihna leh hmalakna zara hlawhtlinpui a ni dawn ta chu lawmawm tiin, a sak hna tan thuai tura bawhzui ngai te bawhzui a nih tur thu a sawi.

JICA lam mithiam te hian ruahmanna siam tawh te chu zirchiangin, siam danglam theih lai ni awma an hriatte vawiin hian enho a ni a. Damlo tana hmun him leh muanawm a nih chu chu an ngaihpawimawh thu leh, human resource development an ngaihpawimawh thu an sawi a. He project hnuaiah hian building sak ngawr ngawr bakah "soft component" an tih - training pek te, inhrilhhriatna te, mipuia cancer screening neih leh zirchianna neih chu pawimawh an ti a. Mizoram cancer case dinhmun en in he "soft component" hi ngaihpawimawh tel ngai nia an hriat thu an sawi. JICA sum bultuma Super Specialty Cancer and Research Centre dinna tur hian sawrkar laipuia ministry hrang hrang tun dinhmunah hian a paltlang tawh a ni.

Vawiin meetingah hian JICA HQ, Tokyo atangin Pu Kota Wakabayashi, Assistant Director, Division 1, South Asia Department leh Pu Shinichiro Kato, Deputy Assistant Director, Division 1, South Asia Department, bakah Pu Shusaku Takada, Representative, JICA India, New Delhi te an lo kal a. Pu R. Lalramnghaka, Secretary, Health & Family Welfare, Pu Vanlal Chhuanga, Principal Secretary, Finance, Lalmalsawma Pachuau, Secretary, Planning & Programme Implementation leh Finance, Planning & Health department hotu dangte an tel bawk.