3022/2022-2023

Aizawl, 12.12.2022: Chief Minister Pu Zoramthanga chuan tukin khan TCIL (Telecommunications Consultants India Limited) hotute nen Aizawl khawpui leh a chhehvel hmun hrang hrangah hmasawnna ruhrel lian dinna tur hmun remchang te a en a. A kaihnawih sawrkar department hotute'n an tawiawm a ni.

Chief Minister ho hian Hlimen Central Workshop a commercial vehicle tana lirthei chawlhna tur terminal atana ruahmanna te thlithlaiin, MoRTH atanga sum hmuha helai hmun veka Transport hnathawh mek te en a ni bawk a. Lalsavunga Zoological Park te tlawhin, Chaltlang Tourist Lodge tihchangtlun theih dan tur remchang te dapin en ho a ni bawk. Heng bakah hian Chief Minister ho hian Chaltlang - Bawngkawn inkar elevated road siamna tur TCIL ten plan an lo siam tawh chu a hmunah landing awmna tur lai an ruahman te enfiah a ni a. Hemi bakah hian Zuangtui Godown tlawhin, ruahman anga mipui tan a awlsam zawkna tura sawnchhuah a nih hnuah he hmun hi tangkai zawka hman theih dan tur te sawiho a ni a. Khawpui lo thanglian zelah khualzinmite thlenna tur mamawh belhna te sawilan ni bawkin, a remchan dan in neih sa tih changtlun leh a thar sak belh theih dan tur te ngaihtuah zui zel tum a ni.

Chief Minister hi Secretary to CM Pu K. Lalthawmmawia, PWD Engineer-in-Chief Pu Bowman, Tourism Joint Secretary Pu V. Lalengmawia leh officer dangte'n an tawiawm a ni.

TCIL hi Department of Telecommunications, Ministry of Communications, Government of India hnuaia awm niin, 1978 khan din a ni.