No.734/2020-2021

Vawiin khan Chief Minister Pu Zoramthanga hovin CM Cabinet meeting room-ah Vegetables and Fruits supply chain chungchanga hmalakna te thlirhona neih a ni a. Horticulture Development Board Vice-Chairman Pu F. Lalnunmawia, MLA leh Horticulture Department hotute he hunah hian an tel a ni.

Chief Minister chuan COVID-19 hrileng kara ei tura harsatna mipuiin an tawh theihna tur sukiang tura Vegetables and Fruits supply chain tluang taka kalpui a ni chu lawmawm a tih thu a sawi a. Mizoram chu chaw leh ei tur dang dangah a intodelh a pawimawh thu sawiin, he hripui hian khawi ram economy pawh a tibuai vek a; ngaiawh tura hma kan lakna turah Mizoram chu "primary economy", agriculture a innghat kan nih angin leh hemi kawnga SEDP hnuaia bul kan lo tan tawhna leh hmalak zelna tur nen intundinna kawngah pawh hma tha tak kan la thei dawn a ni, a ti a. Chief Minister chuan kuthnatawktute thuam that a pawimawh thu sawiin, an tana harsatna lian tak chu tui mamawhna a nih thu leh, fur tui khawl tura ruahmanna tha neih a pawimawh thu a sawi a. Kan ram hi intodelh turin kan kal chho zel ang, a ti a ni.

Vawiin meeting hian Supply Chain chu lockdown kalpui a nih chhungin leh a tul dan ang zela chhunzawm turin a rel a. Thlai chi mamawhna a sang chho hle in, tum hnih thlai chi chah thlen tawh niin a vaiin cheng nuai 87 chuang man a lo ni tawh a. Tunah hian consignment thum chah mek niin, a tul dan ang zela chah belh pawh vawiin meeting chuan a rel a ni.

Sairang leh Khawzawl a Cold Storage trial, enchhinna pawh a hlawhtlin thu vawiin meeting-ah hian report a ni a. Serchhip a Cold Storage sak zawh tawh pawh tih nun thuai tura rel nghal a ni.

COVID-19 hripui leng avanga inkharkhipna kalpui chhunga state chhunga kuthnathawktuten an thei leh thlai thar hralhna tur ruahman sakna turin leh khawpui a chengten ei tur mamawh awlsam zawka an hmuh theihna tura Chief Minister ruahman a Vegetables and Fruits Supply chain hnuaiah hian March ni 28, 2020 khan a hmasa ber atan Aizawl ah thlaithar lakluh a ni a. Nimin (30.94.2020) tlai dar 4 thleng khan trip 164 Aizawl lo thleng tawh in, veng 78 ah heng thei leh thlai te hi sem a ni tawh a. Home leh Rehabilitation Centre ah leh veng pathum ah trip 12 chu a thlawn a sem a lo ni tawh bawk. Heng thei leh thlai zawng zawng leina man hi Rs. 103,22,161 niin, hralhchhuahna chu a vaiin Rs. 97,04,437 a ni.

Mizoram pangpar demand san ber hu lai pakhat - Good Friday leh Easter Sunday chu Lockdown hunchhungah a tlak avangin pangpar hralh theih tak loh avanga hloh zat chu cheng vaibelchhe 2 bawr vel a nih thu vawiin meeting-ah hian sawi a ni bawk.

Aizawl district ah hian Vegetables and Fruits Supply Chain hnuaia hmalakna bakah hian veng hrang hrang LTF leh farmer te direct a indawr an awm vawi a. Lunglei, Mamit, Kolasib, Siaha leh Lawngtlai district ah te hian thlai thar lei leh hralhchhuah hi farmers leh Task Force te inkara tihfel zel niin, Khawzawlah chuan District level task force hnuaia Vegetable Supply Chain Committee kaltlangin VLTF leh chawhmeh kharchhawngin thlai thar an la a. Champhai District ah hian Dulte balhla chu horticulture department in hralhpuiin, Tlangsam leh Zotlang atanga thlai chi hrang hrangte chu Aizawl ah thawn luh an ni a, Chhungte khua atangin Champhai ah thlai hralh a ni bawk.

Vawiin meeting ah hian Horticulture Department changtu Additional Chief Secretary Pu JC Ramthanga, Director Dr. Elizabeth Saipari leh department officer dangte an tel a ni.