Vawiin khan Chief Minister Pu Lal Thanhawla hovin nizung leh thli chakna hmanga kawlphetha siam leh tihlar kawnga buaipuitu leh hmathehtu Zoram Energy Development Agency (ZEDA) Governing Council chu CM Pisaah an thukhawm a. ZEDA hmalakna te thlir letin, chak leh changtlung zawka hna an thawh theih nan ZEDA tihlenna ruahmanna siam chu thuphungin an pawm a ni.
Chief Minister Pu Lal Thanhawla chuan tunlai khawvel sik leh sa inthlak danglam mek leh kan chhehvela environment chhe mekah kawlphetha thianghlim a ngaih nizung leh thli chakna te hi a pawimawh telh telh a, Sawrkar Laipui pawhin hei hi an ngaihvenin a ngaipawimawh hle a, keini pawh hian engtin nge heng thil te hi a tangkai thei ang berin kan hman ang tih hi kan ngaihtuah a ngai a, tan lakna tur kan nei tam hle niin ka hria a ni, a ti. Nizung hmanga kawlphetha siamchhuak company ten sawrkar an dawr mek thu te sawiin Mizoram tan hlawk thei ang berin ruahmanna kan siam leh solar power kan kalpui hi a tul a ni, a ti a. ZEDA hi hemi kawnga thawk an nih angin chak zawka hna an thawh theih nan a a tihlenna ruahmanna siam chu tha a tih thu a sawi bawk.
ZEDA Project Director Pu J.H. Malsawma chuan ZEDA hmalak tawhna te, kum 2017-18 atana an Action Plan te sawiin ZEDA tihlenna tur ruahmanna siam chu presentation hmangin a sawizau a. Meeting chuan he thil hi zau taka an sawiho hnuin he ruahmanna pharh chu a thuphungin an pawm a ni.
Hemi hnu hian Power & Electricity Department, Engineer-in-Chief Pu L. Pachuau chuan Turini Small Hydel Project MW 24 pechhuak thei tura duan project tunah Department in an bawhzui mek chungchang sawiin hemi chungchang hi presentation hmangin a sawizauna a nei bawk a ni.
Vawiin meeting ah hian Principal Secretary to CM Pu Lalram Thanga, P&E Secretary, Pu H. Lalengmawia leh P&E Department hotulu dangte leh ZEDA hotute an tel a ni.
Tuirini Small Hydel Project DPR hi WAPCOS siam niin a DPR hi Mizoram Sawrkara ngaihtuah tura thehluh mek a ni a, a project man hi cheng vaibelchhe 465 niin kum 4 leh a chanve a thawh zawh tura ruahman a ni a. Sawrkarin a pawm chuan state project anga kalpui tur a nih dawn avangin a thawhna tur sum hi loan leh equity hmanga financial instituition kaltlanga zawn leh tur a ni.
