2206/2022-2023
6.10.2022: Zoram Medical College Governing Council chu vawiin chawhnu khan an Chairman Chief Minister Pu Zoramthanga hovin CM Office Conference Hall-ah thu pawimawh tak tak ngaihtuahin an thukhawm.

ZMC Governing Council thukhawm hian Draft ZMC Bye-Laws chhawpchhuah chu an pawm. Hun kal zelah college chu a lo puitling zelin, inkaihruaina a lo phuisui belh zawk nan mithiam hrang hrang inrawkhawm a committee te din in bye-laws hi draft a ni.

Vawiin committee ah hian TB & Respiratory Medicine department-a post siam danglam ngaite, staff nurse indaihlohna te, college tihchangtlun belh zelna tura ram zauh belh chungchang te an sawiho a. Medicine lama thiamna leh inenkawlna in hma a sawn theih nan sawrkar laipuiin medical college hrang hrangah a theih chin china PG zirna siam ni se a tih angin ZMC ah pawh PG course a la awm theih dan tur te sawiho niin, heng bakah hian thu pawimawh dang sawiho a ni bawk.

Deputy Chief Minister Pu Tawnluia, Health & Family Welfare Minister Dr. R. Lalthangliana, Aizawl South-III bialtu MLA Prof. F Lalnunmawia te he meeting ah hian an tel a. H&FW, H&TE, Finance, P&ED, Planning, DP&AR, PWD, PHED leh ZMC hotute bakah MZU leh IMA aiawhte an tel bawk.