Indian Council for Child Welfare ina bultum, Mizoram State Council for Child Welfare ina a huaihawt, National Learn to Live Together Camp, 2011 vawi 34-na chu vawiin khan Chief Minister Pu Lal Thanhawla chuan Tribal Art Centre, Tanhrilah a hawng.

Chief Minister chuan Mizoramin a thlen hmasak ber tum, he Campa  state dang atanga lo tel zawng zawngte chu lo lawmin,  Aizawla an cham chhunga inthlahrung  lo tur leh tlangnel taka awm turin a chah a. Mizoram chu mite tlawh hlawhlo ber state, ram hruaitu tam zawk tena anla tlawh loh a ni a ti a. Chuti chunga an ni in he intawhkhawmna a an lo tel chu a lawmawm hle a ni a ti.

Chief Minister chuan tunlai khawvelah inbiakpawhna tha tak, internet kaltlanga Facebook leh Email te hmangin thian a in siam zung zung theih tawh a, chuvangin hei hi hmang tangkaia inhre tawn zung zung tur leh kan danglamna te in hriatpuia, inhlut tawn sak nan hmang thin turin a chah a. India hi ram ropui tak, mihring chi hrang hrang, mizia leh tihdanphung hrang, sakhua leh tawng hrang awmna a ni a, mize danglam tak tak chengza kan nihna kara, inthurualna leh inpumkhatna kan neih hi kan chakna anih avangin, kan vawn nun reng a tul a ni a ti. He intawhkhawmnaa naupang kalkhawmte chu ram ro in ni a, nakina kan ram hruaitu tur in la nih dawn avangin ram inpumkhatna pawimawhzia hi vawng nung reng turin a chah a ni.

Social Welfare Minister Pu P.C.Lalthanliana pawhin thusawiin, he Campa lo tel zawng zawng te chu tlangnel taka awm tur leh harsatna an neihte sawi hrehlo turin a chah a. Camp buatsaih chhan, state hrang hranga chengte inhre tawna, inzir tawn bawka, danglamna an neih te in hlut tawn sak a ni tih hrereng turin a chah bawk a ni.

Indian Council for Child Welfare President Pi Gita Siddhartha pawhin thu sawi bawkin ICCW hi kum 1952 a din anih thu a sawi a. A thil tum bulpui ber chu Ram Inpumkhatna atan state hrang hranga cheng naupang ten thianah insiama, inhretawn leh inzir tawna, midangte chu mahni anpui ang tho, danglamna an neihte inhluttawn sak a ni a ti.

National Learn To Live Together Camp hi State hrang hrangah a inchhawka nghah thin a ni a. Tun tuma camp hi Mizorama nghah vawi khatna a ni a. 31st Oct - 6 Nov 2011 thleng awh tur camp ah hian State 18 atangin naupang 116 leh an hruaitu (escort) 42 an tel a. State tinin naupang 6 (mipa 3 leh hmeichhia 3), kum 10 - 14 inkar, khawsak harsa zual chhungkua atanga thlan an ni thin a ni.

Inkhawm hi Pu Thanseia, Vice President, Mizoram State Council for Child Welfare in a kaihruai a ni.