SCERT bultuma 37th Cash Awards for Proficiency in Science & Mathematics and National Talent Search (NTS)a lawmman dawngtu zirlai naupangte hnena semna vawiin chawhnua Vanapa Hall-ah buatsaihah Chief Minister Pu Lal Thanhawla chu khuallian a ni.

Chief Minister chuan matric leh class 12 zirlai naupang thiam chungchuang bik ten Science leh Mathematics subject leh National Talent Searcha incentive cash awards dawngtu te chu a lawmpui thu sawiin, an zir zelna turah la dawng chhunzawm zel thei tur khawpa tang mar tlat turin a fuih a. Tunhma deuh chuan Science leh Mathematics zirtirtute chu state dang ami te an nih thin tiin, tunah chuan ram leilung fate ngei an rawn awm chho ta zel chu a lawmawm hle a nia ti a. Zirlaite hi nakina ram leh hnam hruaitu tur kan ti thin tiin, Chief Minister chuan zirlai, nu leh pa leh zirtirtute thuawih, aia upate zah thiam leh nun ukuk te chauh hi ram leh hnam hruaitu ni thei an ni a ti.

Chief Minister chuan technology thang chak takah zirlaite chuan a tunlai ber berte umpha thei tura hriatna tih zau leh lehkha chhiar zau a tul a tih thu a sawi a. School session tharah chuan incentive cash awards hi tihsana Rs.50,000/- ni thei se tih rawtna a awm thu a sawi a.Lawmman dawngtute chu a lawmpui rualin an nu leh pa leh an unau ten tan lak phah nan hmang se a duhthu a sawi a. Vawi khat lawmman lakah duh tawk mai loa tan lak nan hmang sauh sauh zawk turin zirlaite chu a chah a ni.

Vawiina lawmpuina pawifai sem hi Mizoramah vawi 37 hmanna a ni a. Vawiina zirlai lawmman dawngtu zawng zawng hi 77 an ni a, amaherawhchu mi pakhatin pakhat aia tam lawman dawng an awm avangin lawmman hi avaiin 87 sem a ni. Kum 1977 atanga lawmman sem zawng zawng hi vawiina sem nen dawngtu 5789 an ni tawh a, sum sem tawh zawng zawng pawh Rs. 44, 26,100/- a ni.Vawiina incentive cash awards for proficiency in science & mathematics a lawmman hi HSSLC a ti tha te hnenah Mathematics, Physics, Chemistry leh Biology ah te sem a ni a, 1st Prize ah Rs.6,000/- , 2nd Prize Rs.5,000/- leh 3rd Prize Rs.4,000/- te sem a ni a. HSLC ah Science & Mathematics combined, Science leh Mathematics ah sem niin, 1st prize Rs.5,000/-, 2nd prize Rs.4,000/- leh 3rd prize Rs.3,000/- te an ni a, Class IX leh XI zirlai promotiona ti tha bikte hnenah Rs.2,500/- sem a ni bawk.

Lawmman semna inkhawmah hian Education Minister Pu H.Rohluna leh Parliamentary Secretary Pu Joseph Lalhimpuia te an tel a, inkhawm hi Pu Zothanmawia, Jt Secretary, School Education in a kaihruai a ni.