3285/2022-2023
Aizawl, 18.01.2023: Chief Minister Pu Zoramthanga chuan tukin khan Thuampui leh Zemabawk North ah kalin hmasawnna ruhrel dinna tur rawtna leh hmalak mekte chu a hmunah a enfiah.

Chief Minister hian a bial Aizawl East-I chhunga hmalakna a tlawh zingah hian Zemabawk Bethel leh Middle School inpawhna kawng zauh hna thawh mek chu a enfiah a. Thuampui Veng chhung inkalpawhna kawng siam rawtna awm pawh a hmunah kalin, kawng laih theih dan tur remchang a awm em tihte thlir ho a ni.

Chief Minister chuan hmasawnna hna thawh tur hmabak tam tak a la awm thu sawiin, tun hun atan chauh nilo, rei tak daih hmasawnna ruhrel ngelnghet tak siam a pawimawh thu te, chutiang rilru pu a project te pawh siam a pawimawh thu a sawi.

Chief Minister hi PWD hotute leh khawtlang hruaitute'n an tawiawm a ni.