Chief Minister Pu Lal Thanhawla chuan vawiin khan Tanhrila Academy of Integrated Christian Studies (AICS) hmuna Shekina Hall-ah ‘A History of Ecumenical Movement in North East India : With Special Reference to the North East India Christian Council’ tih lehkhabu Rev. Dr.M.Thangkhosei Haokip, Associate Professor, AICS ziah a tlangzarh.

Chief Minister chuan India hmarchhaka kohhran hrang hrangte inpumkhatna a than chhoh dan ziaka buatsaih a ni chu Rev.Dr.M.Thangkhaosei Haokip chungah lawmthu a sawi a. India ram hmun hrang hrangah kohhrante thil tihah a tel tawh thin thu sawiin, Pu Hawla chuan kristian kan nih angin kohhran te hi hmun khatah luangza thei ila tih hi a duhawm ber a, chumi hawi zawnga kan kal te pawh a tul hle a ni a ti. Sorkar leh kohhran te hi inpawh taka thawkho tur kan ni a ti.

Chief Minister chuan zofate hi Pathian lakah vohbik kan ni tiin, hmun hrang hrangah khawsa mahila, A thu kan zawm phawt chuan kan ding chhuak thei a ni a ti a. Sum leh paiah leh ei leh barah intodelh a, hnam zahawmah min siam a duh a, chumi dinhmuna ding turin sorkar chuan hma ala chho mek reng a ni a ti. Kan lamah Pathian a tana, A malzawmna tam zawk kan hmuh theihnan A lamah kan tan hmasak a tul a ni a ti.

Lehkhabu tlangzarh tak ina a tum ber chu hmarchhak a kohhran hrang hrangte inpumkhatna kawnga hmalaknate leh a than chhoh dan, leh kohhran hrang tam lutukin khawtlang nuna nghawng a neih dan te a ni tlangpui a ni. A bu hi phek 302, bung thuma then a ni.

Lehkhabu tlangzarh inkhawm hi Rev. Dr. Zolawma, Principal, AICS in kaihruai a ni.

 

 

Attachment

  • Loading attachment...