Vawiin khan Chief Minister Pu Zoramthanga chuan Zemabawk YMA Hall-ah Aizawl East-I Constituency chhunga kumin HSLC leh HSSLC exam a zirlai hlawhtling 659 hnenah lawmpuina a hlan.

Chief Minister chuan zirlai hlawhtlingte a lawmpui thu leh kum hmasa nen khaikhin a pass zat an pun chungah lawmthu a sawi a, exam lo awm zel turah pawh hmasawnna hmuh belh zel a beisei thu te a sawi. Pu Zoramthanga chuan zirlai hlawhtlinna changte chu taimakna leh tumruhna thlah lo turin leh an hmabak zela theihtawp chhuah thin turin a chah a. Harsatna mihringin a tawh hian reh hun a nei thin a, mi tumruhte tumruhna chu a daih rei zawk thin tih chu hre reng turin zirlaite a chah a ni. Tawng dang thiam nal a pawimawh thu sawi bawkin Chief Minister chuan tunlai khawvelah hlawhtling tur chuan tawng thiam tam a ngaih tawh thu a sawi a. Zirlaite chu hriselna ngai pawimawh turia chah tel bawk in, mi puitling leh hmantlak an nih theih tur laka an nun rawkbo theitu ruihtheihthil laka fihlim turin leh an nun uluk turin thangtharte a chah a ni.

Aizawl East-I Constituency chhungah hian HSLC exam pass zat in report hi mi 387 an ni a, topper Lalrinnungi, St. Joseph HSS pawh a tel. HSSLC pass zirlai 272 an awm bawk.