No.7061/2020-2021

Chief Minister Pu Zoramthanga chuan vawiin khan Bairabi Kawnpui Lui Bailey Bridge thar chu a hawng; FCS&CA Minister Pu K. Lalrinliana chuan a tawiawm a ni.

Chief Minister Pu Zoramthanga chuan Kawnpui Lui Bailey Bridge chu Zoram mipui chawmtu buhfai lakluhna kawng pawimawh tak a nih thu sawiin, sawrkar department leh contractor ten theihtawp an chhuah avang leh Bairabi mipuiten thawktute an tawiawmna avang a ni a ti. Mizorama chakkhai pawimawh rel (train) chawlhhmun atanga phur chhuahna kawng pawimawh tak a nih avangin leh helai lei hmasa kha a chak that tawk tawhloh avanga state sawrkarin sum remchang ang ang hmanga lei thar siam a nih dan Chief Minister hian a sawi a ni.

Vawiina lei (Bridge) hawn tak hi TDR EW 70R with pedestal Bailey Bridge niin, cheng nuai 365 seng a dawh fel a ni a. Lei a zuk innghahna +Abutment/Foundation) hi Contract hranin Mizo in an thawk a, tunah hian River training leh approach hi duh anga la zawh fel loh a ni a,a thawk zo thuai tura ngaih a ni. A Bridge bik chu Essen Infrastructure Pvt. Ltd , Kharagpur ten ni 20 chhungin an rawn dawh zo a ni.

Kawnpuilui west Bailey Bridge hi National Highway No.154 a kilometre 94.20 hmun a awm a ni a. Bridge hlui zawk hi Mizoram PWD in kum 1998 a a dawh a ni. Kum 2015 ah thawmthat a ni leh a. Tlawng lui lian in a rawn chim san chang a awm avangin leh Lei hman lai hi a hlui deuh tawh bawk avangin leh a chak tawk loh avangin kum 2018 (April-June) khan Bridge thlang lamah a thar dawh tura ruahman a ni a. Furin a nan zui tak avangin foundation laihin bridge a tih chim hlauhawm khawpin a nghawng ta a. Hmanhmawh takin Lei feet 130 kha feet 20 a zawm belhin Bairabi lamah pawhsei a ni ta a; Ton 40 phur tlan phal ni thin kha ti tlemin Ton 30 phur bak tlan phal a ni ta lo a ni. Bungraw phur rit tak tak, tam tak tlan a ngaih si avangin bialtu Minister leh Chief Minister te hmalakna in Ton 100 phur pawh tlan theihna Lei dawh a ni ta a ni.

Chief Minister chuan vawiin hian FCS&CA Oil depot, tuialhthei dahkhawlna hmun tur ram thlithlai mek chu a enpui nghal bakah Bairabi panna kawngpui siam that ngai lai te a en bawk a ni.

Bialtu MLA FCS&CA Minister bakah Chief Minister hi FCS&CA Secretary Pu Vanlalngaihsaka, PWD Engineer-in-Chief Pu Lalmuankima Henry, FCS&CA Director Dr. Lalhriatzuali Ralte, PWD Chief Engineer (Highway) Pu Bowman leh officials dangten an tawiawm a ni.