Chief Minister Pu Lal Thanhawla chuan nimin (6.6.2018) khan Mizoram chhunga Permanent Bridge PWD in a dawh tawh zinga sei ber leh Mizorama sei ber dawttu, Bairabi Tlawng Lei (Pre-Stressed Concrete Bridge), NEC 10th Plan Scheme atanga dawh chu a hawng. Chief Minister hi Pi Lal Riliani, President of Indian Society on Health & Tobacco: Mizoram Chapter; Transport Minister Pu John Rotluangliana; PWD Minister Pu Lal Thanzara, Minister of State Pi Vanlalawmpuii Chawngthu, Hachhek bialtu MLA Pu Lalrinmawia Ralte, Political Adviser to CM; leh Pu Zoram Sangliana, Kolasib bialtu MLA ten an tawiawm a ni.

Rs. 1413.03 lakhs senga Tlawng Lei dawh hawnna inkhawm, Bairabi a buatsaihah hian Chief Minister Pu Lal Thanhawla chuan Mamit leh Kolasib district pahnih inkalpawhna pawimawh tak Lei thar chu a nih tur thu leh lawmawm a tih thu a sawi a. Mamit District tan chakkhai hrang hrang lakluhna leh thil thar hralhchhuahna kawng zau takin a inhawn phah dawn thu te, Kolasib District leh Bairabi chu Mizoram chhuahka pawimawh an nihna belhchhahtu a nih tur thu te a sawi a. Rel kawng lian nen a inthlunzawm tawh bawk avanga hun reilo te ah Bairabi chan hmasawnna nasa zawk an la hmuh tur thu a sawi. Chutihrual chuan Bairabi mipuite leh Lei hmang tangkaitu zawng zawngten enkawltu leh neitu rilru pu reng turin a chah bawk.

Chief Minister chuan hmasawnna ruhrel Kawng tha leh Lei tha kan nei chho zel ang a, kuthnathawktute pui turin agricultural link road pawh tam zawk siam zel ang tiin, tuna link road te pawh all weather road a siam vek tum a nih thu a sawi a. Mizoram chu Asia hmarchhak ramte nena India nen a insumdawntawnna ah kawtchhuah pawimawh a siam tura Kaladan Multi Modal Project thawh mek a nih thu te, rel kawng pawh Bairabi a tawp mai lovin Sairang thleng tur rel kawng siam mek a nih thu te, Mizoram chhim lam rel kawngin a thlen theih nan leh thlawhna tum hmun siam tura hma lak mek zel a nih thu te a sawi bawk a. Chung chu Mizoram economy thanna belhchhahtu a nih zel tur thu a sawi. Chief Minister chuan heng hmalakna te let NLUP leh NEDP kaltlanga hna thawh te hian mipui tan a thui thei ang bera hmasawnna a thlen nan rilru puthmang dik neih pawimawh a tih thu a sawi bawk a. Insumdawntawnna in hma a sawn a, state tharchhuah te ram pawna awlsam zawka thawnchhuah a nih bawk chuan avanga pawn lam atanga sum lakluh a tam ang a, kan state a lo hausa dawn a, chutihrual chuan ringtu kan nihna kan nunah a lanchhuah a, rinawmna kan vawn ngheh reng a tul a ni, a ti. Kut tlinglo a sum lakluh tumte avanga sawrkar hmalakna hrang hrang a chak theih loh chang awm thu sawiin Chief Minister chuan kuttlinglo a sum lakluh duhlo a, sawrkar hmalaknate hi mipui tan a ni tih hre thar a sawrkar thawhpuitu tha ni zel turin kalkhawmte chu a sawm a ni.

PWD Minister Pu Lal Thanzara chuan nimin lawka Tut Lei tha tak hawn a nih hnu ah vawiina RCC Lei tha tak mai Bairabi ah hawn leh theih a ni chu lawmawm tiin, hengte hi Mizoram PWD tana hlawhtlinna ni mai lovin Kolasib District leh Mamit District pumpui tan malsawmna a nih thu a sawi a. Bairabi Ieh a chhehvela hmalak tur hrang hrang PWD Minister chuan a tarlang bawk a. Bairabi - Zamuang Road chu kumin 2018-2019 chhunga NABARD hnuaia siamthat turin Rs. 43 crores ruahmanna thehluh tawh a nih thu leh heti chung hian tuna kawng chhuat hi fur laia a hlauhawm avangin, kawng chei nan kumin 2018-19 hian NEDP hnuaiah Rs. 200 lakhs dah a nih tel thu te; Mamit - Bairabi Road pawh kumin 2018-19 chhunga chei nan Rs. 350 lakhs chu NEDP hnuaiah dah a nih thu te a sawi a. Bairabi - Bilkhawthlir kawng, NH -154 chu Ministry of Road Transport & Highways hnuaia awm a nih avanga Ia khawih mai theih loh a nih thu leh Rengtekawn (Kolasib bul) chu State Highway NH-154 chu pavement siam nan NEDP ah Rs.1000 Iakhs dah a nih thu a sawi bawk.

Nimin programme-ah hian Minister Pu John Rotluangliana, Minister of State Pi Vanlalawmpuii Chawngthu, Hachhek MLA Pu Lalrinmawia Ralte leh Kolasib bialtu MLA Pu Zoram Sangliana ten thu an sawi bawk a. Lei dawh thar avanga Kolasib district leh a bik takin Bairabi khaw mipuite tan malsawmna nasa tak a thlen tur thu leh chumi avang chuan lawmawm an tih thu an sawi a ni.

Bairabi Tlawng Lei hi Ministry of DoNER hnuaia NEC fund a dawh niin, Central leh State in sum a insemna chu 90:10 a ni a. Lei hi metre 7.50 a zau, meter 160 (525ft.) a sei niin, footpath metre 1.50 a zau Lei sir tawn tawnah siam a ni bawk. Lei in a dawl zawh chin (load capacity) chu 70R niin, hei hi Indian Road Congress standard a load sang ber a ni. ABCI Infrastructure Private Limited chu he Lei sakna contract pek an niin, June ni 28, 2008 khan bul an tan a, harsatna hrang hrang an tawh hnu ah December 2017 khan Load Test neih theih a ni a, January ni 31, 2018 khan peih fel a ni ta a ni.

Bridge hawnna programme hi Er. R. Vanlaltluanga, Engineer-in-Chief, PWD chuan kaihruaiin, Er. Vanlalmuana, S.E. PWD, Western Circle chuan report a pe a. Er. R. Lalrintluanga, Chief Engineer (Roads) chuan lawmthu sawiin hun a khar a ni. Programme-ah hian Kolasib leh Mamit DC te, Kolasib SP leh Kolasib a district Officer engemawzah bakah PWD officials te leh tlawmngai pawl leh khawtlang hruaitute an tel a ni.