Mizoram pum huap Boxing inelna - Mizoram State Boxing Championship vawi 33-na kharna programme vawiina SAI Center Mission Vengthlanga neih chu Chief Minister Pu Lal Thanhawla’n khuallian niin a hmanpui a; Chief Minister hi a nupui Pi Lal Riliani’n a tawiawm a ni. Kharna programme hi Dr Zorammawia, President Mizoram Boxing Association (MIZBA) in a kaihruai a; Championship Technical Report Pu P C Lalnunmawia, Ring Official Chairman chuan a pe a ni.

Pu Lal Thanhawla chuan Sports discipline hrang hranga Mizo thalai ten hma an sawn chho zel leh sports lama rualawh nachang thalai ten an hre chho chu  lawmawm tiin infiammite chu zuk leh hmuam ti lo turin leh ei leh in ah te insum  turin a fuih nghal a. Boxers te chu sportsmanship spirit, Boxing Ring chhunga  lantir chu duhtawk mai lovin an khawtlang nunah te pawh chawmnung zel turin a chhah bawk a ni. Chief Minister chuan MIZBA leh Sports Association hrang hrang hruaitute chu Sports hmasawn nan Sorkar finchhuah pui a, kaihruai a, thurawnte pe  thin turin a ngen a ni.

Chief Minister chuan Championship a Team ti tha berte - pakhatna SAI Team leh pahnihna Mamit Team te hnenah Trophy a hlan a. Pi Lal Riliani chuan Best Boxer Tv. Vanhlimpuia, SAI leh Best Loser Tv. R. Lalhmangaiha, Kolasib te hnenah lawmnan a hlan bawk a ni. 

Championship hi November ni 1 khan tan a ni a, vawiin ah zawhfel a ni ta a. Championship ah hian Mizoram khaw hrang hrang 82 atangin boxers 362 an tel a. Category hrang hranga tel te leh Weight Category  te chu – Senior Men ah boxer 188, Weight Category 10; Senior Women ah boxer 8, Weight Category 3; Junior Boys ah boxer 135, Weight Category 16 leh Junior Girls ah boxer 31, Weight Category 9 te an ni.