3340/2023-2024

Dated Aizawl, the 13th January, 2024: Vawiin khan Chief Minister Pu Lalduhoma chuan CM Conference Hall ah British Army nih tuma inbuatsaih Inspired Agency te buaipuia dilna thehlut mek thalaite a kawm.

Chief Minister chuan duhsakna hlanin, British Army nih tum heti zat kan nei che u hi lawmawm ka ti a, in chhuanawm hle a ni, a ti. British Army a mizo thalaite an luh theih dan tur sawia Deputy High Commissioner, incharge of east India nena tunhnaia an inkawmna chanchin a hrilh a. Deputy High Commissioner hi rawn zin a tum a, in thil kalpui dan te chipchiara ziakin min han pe ula, in harsatna te lo sawipui ka tum dawn nia. Chutiang bawkin sawrkar atanga puihna in beisei te pawh in chanchin chipchiar kan lo zir hnuah kan sawiho leh dawn nia, tiin a chah a ni.

Thalai rual mi 43 ten commonwealth countries atanga British sipai luh theihna dan hmangin application an thehlut a. British sawrkarin dilna lehkha an kaltir dan hi a inan vek loh avangin an dilna thlen chin te hi an inchen vek lo a ni. An zingah hian mi pakhat chuan February ni 29 a assesment (medical, physical leh written test) nei turin engkim a paltlang tawh a, visa pawh a hmu tawh a, kal turin a inpuahchah mek a ni. Midang 10 ten assesment neih hun tur an nghak mek a, midang te dilna pawh hi buaipui (process) mek an ni hlawm Qualification hi pawl 12 chin, feet nga tling an ni tur a ni.

British Army dilna thehlut mek te hi an vaia an rawn kal theih loh avangin an zinga thenkhatte Chief Minister hian a kawm a, Pu V.L Zaithanzama, MLA chuan a tawiawm a ni.