British Deputy High Commissioner Sanjay Wadvani chu tukin zing khan Chief Minister Pu Lal thanhawla chuan tukthuan kilpuiin Chief Minister Bungalow-ah inkawmna hun tha tak an nei.

 

 

Mizoram dinhmun leh hmasawnna kawnga sorkar hma lak tum dan te Chief Minister chuan Pu Wadvani hi sawipuiin India sorkar “Look East” policy mila Kaladan multi-modal project buatsaih mek te, Mizoram chhim lam kalpawhna tura airstrip buatsaih tum te, Myanmar leh Bangladesh nena insumdawn tawnna tihpuitlin mek te, power siam chhuahna tur project lian tak tak zinga Turial Hydel project tharthawh leh a nih dan te, zirna lama hmasawnna tur zingah NIIT din tur te, sorkar hmachhawp lian ber NLUP chungchang te a tarlang a. Mizoram sorkar chuan Public-Private Partnership (PPP)kalphung zuiin hmasawnna hna thenkhatah chuan private company leh conslutancy firm te nen thawkho tura ruahmanna a neih thu pawh Chief Minister chuan a sawi a. Pu Wadvani chuan UK company tam tak India ram khawpui liana inbun tawh ten hmarchhak lam hawi nachang an la hriat loh thu sawiin heng private company te service hman tangkai theihna turte ngaihtuah hova, thawhho theihna laite dap ho ni se tia a rawt chu Chief Minister chuan tha a tihpui thu a sawi.

Chief Minister a hmuh hma hian Pu Wadvani hian Chief Secretary Pu Vanhela Pachuau pawh a office-ah a hmuin a kawm a. Ram hmasawnna atana sorkar ruahmanna te, ram himna chungchang te, khawtlang nunphung leh thildangte a sawipui bawk a ni. Mizoram a rawn tlawh hma hian Pu Wadvani chuan hmarchhak state thenkhat pawh an dinhmun te thlithlaiin a tlawh kual tawh a. Mizoram sorkar hotu hrang hrang te a hmuhna ah Pu Wadvani chuan Mizoram a rawn tlawh hian ram chhung politic leh economic dinhmun te rawn thlir a, UK nena thawh ho theihna tur te ngaihven tura lo kal a ni tih a sawi a ni.