Vawiin chawhma khan Chief Minister Pu Lal Thanhawla chuan a Pisa-ah  Mizoram chhunga Border Roads Organisation(BRO) hmalakna chungchangah Brig. Birender Singh, Chief Engineer, Pushpak chu a kawm a.

Chief Minister Pu Lal Thanhawla  hnenah Brig. Birender Singh chuan Mizoram ramri hrula an enkawl mek kawngpui te, kawngpui dinhmun, hmalak a nih dan, an harsatna leh Chief Minister in hmalakpui thei se a duhna lai te chipchiar takin lehkha pawimawh nen a thlen a. Chief Minister Pu Lal Thanhawla   chuan tunlai India leh a thenawm ram te inkara politics te thlirin ramri hrula kawngpui dung te pawimawhna chu nasa takin a sang tih a sawi a. Ramri hrula cheng mipui te tan ei leh in, mamawh thiar luhna kawngpui pawimawh takte a nih bawk avangin BRO chu an theihna zawnah chak zawka hma la turin a fuih a. Central sawrkar-ah a ranglam a lehkha ziakin BRO te mamawh leh harsatna te thlen a tum tih Brig. Birender Singh hnenah hian a sawi a ni.

Pushpak chuan kumin hian an kum 50 tlin lawmna neih an tum tih leh chumi denchhena mipui vantlang rawngbawlna hrang hrang kalpui an tum thu an sawi a. Thalaite tih hmasawnna kawngah leh hnathawh tur zawn hmuhpui kawngah tlawmngai pawl lian ber YMA leh a thurualpui te thawhpui an tum thu an sawi lang bawk a ni.