Vawiin khan Chief Minister Pu Lal Thanhawla chuan Champhai District, Mizoram District 8 zinga pawn lama inthiar awm lohna District hmasa ber 'Open Defecation Free' (ODF) District-a puan anih lawmna programme DC Indoor Stadium, Keifangtlang, Champhai ah buatsaih chu khuallian niin a hmanpui. He lawmna programme ah hian PHE Minister Pu Zodintluanga; Parliamentary Secretary Pu TT Zothansanga; ZOHANDCO Chairman Pu R. Vanlalvena leh MLA Pu Lalrinliana Sailo te pawh an tel a ni. PHE Department Engineer-in-Chief leh a thawhpui senior officer te, Champhai District a Sawrkar officer zawng zawngte,  khaw tin VC Member te leh tlawmngai pawl hrang hrang hruaitute bakah he hun pawimawh taka tel turah Myanmar Chin state a Chief Minister in a aiawh mi 2 a tirh te pawh an tel bawk a ni.

Chief Minister Pu Lal Thanhawla chuan Fai hi Pathian an teuhna ber anih avangin Open Defecation Free tih hi Ringtu nen pawh inhmeh tak a ni, a ti a. Hmanlai kan pi leh puten inthiarna in neilo mahse zun leh ek an thlahdah lova, awmzei nei takin zunram thiarna hmun tur an bithliah a, tuikhur tihbawlhhlawh an phal ngai lova, hun a inher chho a, zunram thiarna kawnga hma kan sawn zel a, state dangte ngaihtuahin kan dinhmun hi a tha hle a ni, a ti a. Mizorama pawna inthiar awm lohna District hmasa ber Champhai a ni chu a lawmpui thusawiin Model state a Mizoram kan hlankai theihna kawng pawimawh tak chu faina leh hriselna kawnga theihtawp chhuaha hma lak a ni, a ti a. Hmasawnna kawnga faina leh thianghlima in dinhmun pawimawh tak a chan dante sawiin tunlai khawvel ah bawlhhlawh paih leh sawngbawlna kawnga tih tur leh tan lakna tur kan nei tam a tiin hemi kawnga hian hma lakna hrang hrang kalpui mek a nih thu a sawi. Fai chu Ringtu nun nen a kalkawp dante sawiin Ringtu kan nihna zawn atanga hnam hrisel ber niawm tak hi hnam hrisel lo ber kan ni a, cancer leh HIV/AIDS ah kan dinhmun te hi a chhuanawm lova, kan inbihchian hi a pawimawh khawp mai a ti.

Chief Minister chuan Mizoram Sawrkarin faina leh thianghlima te hi ngaipawimawhin Swacch Bharat Mission awm hma daih tawh kum 1997 atang khan Clean Aizawl leh Clean Mizoram te chu a kalpui tan a, tunah Central Sawrkar in faina leh thianghlima a vei hma in he thil hi veiin tan kan lo la tawh a ni, a ti. Champhai District mipuite chu faina kawnga theihtawp an chhuah a, Sawrkar thuneitu leh tlawmngai pawl thawhpuia ODF District hmasa ber in ni hi in fakawm a, theitawp chhuaha ODF hi vawng zel turin ka chahin ka sawm duh che u ni, a ti a.  Kawng hrang hrangin Mizoram hi khawvel hriata phochhuah tumin hma kan la mek a, theihtawp chhuaha Sawrkar hma lakna ah hian ram lei lung faten mawhphurna inchen kan nei vek a, hetianga kan ngaihtuah hi a pawimawh a ni, a ti. Mihring kan tlem avangte, inthliarna a awm loh avangte leh sakhaw khat vuan, tawng thuhmun nei kan nih te hian India ah state fai leh thianghlim ber kan ni thei a, hemi kawnga hian Sawrkar thawhpuia theihtawp chhuah turin mipuite ka sawmin ka ngen cheu ni, a ti bawk.

Chief Minister hian ODF puan denchena Souvenir buatsaih a tlangzarh nghal a. Chief Minister Pu Lal Thanhawla hi Swacch Bharat Mission hnuaia state hrang hrang Chief Minister 15 awmna Sub-Committee ah a tel a, Hmarchhak atanga Chief Minister awm chhun a ni.

UD & PA Minister Pu Zodintluanga chuan faina kawnga Champhai District mipuite thawhhona leh inlungrualna chu a ropui leh a entawntlak thu a sawi a. Inhnathawh hian Mizoram pum a tha zawngin a nghawng mek a, District dangte te pawh ODF ni turin tan an la mek a, in hnathawh hi Mizoramin kan chhawr mek a ni, a ti. He hunah hian Ngopa, Khawzawl, Khawbung leh Champhai RD Block, BDO te hnenah an semchhauh tur Village Level ODF Certificate a hlan bawk a ni.

Parliamentary Secretary leh Champhai North bialtu Pu TT Zothansanga chuan hmanlai inthiar dan kalsana Champhai District Mizorama ODF District hmasa ber a ni chu lawmawm tiin hemi atan hma latu zawng zawngte hnenah lawmthu a sawi a. Champhai District a Sawrkar hmalakna hrang hrangte a tarlang bawk a ni.

Pu R. Vanlalvena chuan ODF dinhmun vawngnung zel tura mipuite chahin ODF vawnnun zel nana tih tur thil pawimawh hrang hrang a hriat te a sawi tel bawk a ni. Aizawl South I bialtu MLA hian Biate hi Model Village atan thlangin hma a lakpui mek a ni.

Tuichang bialtu MLA Pu Lalrinliana Sailo chuan economics ah hriselna in dinhmun pawimawh tak a luah dante sawiin hriselna, faina leh thianghlimna veia hmun tina a pawimawh dante bang lova sawitu Chief Minister te nupa in he hun pawimawh tak an hmanpui chu a inhmeh leh ropui a tih thute a sawi a ni.

ODF lawmna programme hi Champhai DC Pu Vanlalngaihsaka, IAS chuan kaihruaiin he huna khawtlang leh tlawmngai pawl hruaitu kalkhawmte chu tha tlah lova faina lam hawi zawnga tan la chhunzawm zel turin a chah a. Hunserh hmangtu Rev. C. Lalngaihthanga'n  Pathian Thu in Ringtu te fai leh thianghlim turah a phut dan te sawiin hun a hmang a. Pu K. Zohmingliana, Secretary, District Swacch Bharat Mission (Gramin) Committee chuan ODF atana hma lak dante sawiin ODF Report a tarlang a. Pu K. Lalmawia, President, Champhai District VC Association pawhin hun hmangin he dinhmun a hlankaitu atana a thawhpui VC te, District thuneitute, tlawmngai pawl hruaitute leh mipuite inpekna leh thawhhonaah lawmthu sawiin ODF hi ngaihpawimawh zel turin a thawhpui VC te a ngen a ni. DRDA  Champhai District Project Director Pu C.C. Lalchuangkima'n lawmthu sawiin hun kharna a nei.

Champhai District ah hian khua 80 leh khawpui 4 a awm a. Khaw 63 hian kum 2015-16 khan ODF an nih thu an puang a, khaw dang 17 ten kum 2016-17  tir lama ODF an nih thu an puang bawk a. Hengte hi Block, District leh State Level Committee ten an endik hnuin December ni 19, 2016 khan Champhai District a thingtlang khaw zawng zawngte chu ODF nia pawm leh puan a ni a. Hetih laiin UD & PA Department leh DRDA hmalakna in khawpui 4 a inthiarna nei lo te tan ekin sak sak niin a lak a ni a, hengte hi Quality Council of India in December ni 21 leh 22 ah an endik hnuin Champhai khawpui urban areas te pawh ODF a puan a ni a. Hemi hnu hian Champhai District pumpui (thingtlang leh khawpui) chu Mizorama pawn lama inthiar awm lohna District hmasa ber an ni ta a. India a District awm zawng zawng 707 ah Champhai District hi ODF District 82-na a ni ta a ni. Hemi dinhmunah District hlankai anih thei nan PHE Department hian khaw 52 a chhungkaw 821 te tan ekin an sak sak a, DRDA in Ni 100 in hlawh kaltangin BDO te kaihhruaina hnuaiah khaw hrang hrangah ek in 1012 an sak a, UD& PA Department leh DRDA ten Champhai, Khawzawl, Khawhai leh Biate khawpui ah te inthiarna 404 an sa bawk a ni.