No.4866/2020-2021

Aizawl the 8th September, 2020: Vawiin khan Chief Minister Pu Zoramthanga chuan Nghilhloh Bu, kum 2020 Chapchar Kut post souvenir chu CM Conference Hall-ah a tlangzarh.

Chief Minister chuan Nghilhloh Bu a tlangzarh chu chhiar man hla tak a nih ngei a rin thu sawiin, a buatsaihtute chungah lawmthu a sawi a. Chapchar Kut hi kan culture min thuikhawmtu zing a pawimawh tak a ni a; sawrkar atang pawhin hetah hian pawisa awm ang ang atangin tlin chin chin hman a lo ni tawh thin a ni, a ti a. State dang pawhin an hnam ziarang chawisanna cultural festival theuh an lawm thin angin Mizo te pawhin kan kut pawimawh hi ropui takin hman atanga kan lo lawm tawh thin thu sawiin Chief Minister chuan culture hian hun kal zelah hma a sawn ve zel a, midang tih dan la a pawlhdal lam nilovin, amah hi a thang in hma a sawn zel angin kan culture phochhuahna ber kut kan lawm dan pawh hian hma sawn ve zelin, state dang leh ram danga kan unau te tan pawha chhim man hla leh zuala siam a pawimawh thu a sawi.

Chief Minister chuan Mizo hnam ziarang leh nunphungah hian midang tan entawntlak tak tak a awm thu a sawi a. Tun Covid hrileng karah pawh state dangte nen khaikhin chuan Mizoram chu hma la tha ber a ni a. Hei hi a chhan pawimawh tak chu mipui tanrualna leh tlawmngaihna te, inthununna nei tha kan nih vang nia a rin thu a sawi a ni.

Nghilhloh Bu tlangzarhna programme tawi buatsaih hi I&PR Director Pi Lallianpuii chuan kaihruai in, kum dang anglo takin kumin chu hrileng avang leh thil dang dang avangin Chapchar Kut lawm hnu lawka souvenir tlangzarh tum chu a khawtlai phah tak thu a sawi a ni. Dr. Malsawmliana. CYMA Asst. Secretary chuan report pe in, Pi Carol VLMS Dawngkimi, Jt. Director, Art & Culture Department chuan lawmthu sawiin hun a khar a ni.

Chapchar Kut 2020 souvenir tlangzarh tak hi phek 114 niin, thuchah leh Mizoram hmun hrang hranga kumin Chapchar Kut lawmna hlimthla engemawzat dah a nih bakah thuziak mi hrang hrang te article 13 a awm a. A vaiin copy 2600 print a ni.

Attachment

  • Loading attachment...