Chief Minister Pu Lal Thanhawla chuan vawiin khan Chawmkai a Mat Lui kan na tur Lei (Bailey Bridge) lungphum a phum. He bailey bridge siam tur hi NEDP scheme 2018-2019 sum hmanga siam tur a ni a, tuna temporary suspension bridge awm mek chu a thlak ang.

Chief Minister chuan Mat Lei, Chawmkai a dawh tura hmalak a ni chu lawmawm tiin, kuthnathawktute eizawnna kawnga chhawk zangkhaitu a nih tur thu a sawi a. Mat ruam hi buh leh bal leh thlai dang thar chhuahna hmun pawimawh a nih avangin he Lei hi dawh zawh a nih chuan helai mipuite tan agriculture leh economy hmasawnna hmanraw tangkai tak a ni ang, a ti a. Kuthnathawk mite sawrkarin a ngaipawimawh in a theihna apiangah remchanna a siam sak thin thu a sawi bawkin, Lei dawh hna pawh chu chak taka thawh zawh a beisei thu a sawi.

Pu Lal Thanhawla chuan ramin a mamawh ang zelin sawrkarin policy a siam thin thu a sawi a; rambuai laiin remna chu mipui mamawh ber a nih avangin remna leh muanna a thlen theih nan hmalak a ni a, chumi hnu ah mipui retheihna khur atanga khaichhuak tura hmalak ni leh in, kuthnathawktu leh eizawnna ngelnghet nei lo te tan NLUP hmanga mahni khawbuzawla thlamuang taka an khawsak ve theih nan hmalak a nih thu te, chung hmalakna zawng zawng tichak a belhchhah turin NEDP duanchhuah a nih chhoh zel dan te a sawi. Chief Minister chuan ram hmasawn leh intodelh ni tura hmalakna hna kalpui mek te sawiin, kawlphetha a intodelh theih nan Hydel Project bakah ni zing chakna hmanga kawlphetha siam chhuahna Solar Energy Plant hmun engemawzah ah bun a nih thu te a sawi a. Inkalpawhna kawnga hmalakna chuan Kaladan Multi Modal Transit project nen inthlunzawm in Mizoram chu sumdawnna chhuahka ni tura buatsaih mek a nih thu te, ei leh in Mizoramin a thar chhuah leh a siamchhuah te chu man man zawka hralh theih tawhin, eizawnna kawng a inhawng zau zel dawn a ni, a ti a. Sawrkar hna a innghat ringawt lovin eizawnna tha dang tam tak thalaiten an neih theih nan Entrepreneurship Development Scheme neih nih thu te a sawi bawk.

Lei sakna lungphum phum puala inkhawm buatsaih hi Er. R. Vanlaltluanga, Engineer-in-Chief, PWD chuan kaihruaiin, Chawmkai ah hian mi 300 chuangin nitin eizawnna atan lo an kal naah tuna suspension bridge awm mek hi an kan a ngaih thin thu a sawi a; tunah chuan fur leh thal a hman kawp theih tur Bailey Bridge a thlak thuai a ni tur chu a lawmawm in, kuthnathawktute eizawnna puitu dik tak a ni dawn a ni, a ti.

Er. Vanlalchhuana, S.E., PWD Eastern Circle chuan report a pe a. Lei hi feet 180 a thui, feet 9.10 a zau tur a ruahman a ni a. A dawl zawh chin chu 24R IRC Loading Class niin, a lei chhuat (deck level) hi 381.467 metre (above sea level) ah dawh a ni ang a, chu chu fur tui chim san lai ber aiin metre 2 a sang a ni. Lei sakna tura estimated amount chu Rs. 571.00 lakhs niin, tunah hian thawk tur online in quotation koh mek a ni a, hna pum pui hi thla 18 chhunga thawh zawh tura beisei a ni.  thu a sawi. Lei hi NEDP hnuaia Public Works Department in an project thawh tur a ni a. Mizorama Galvanized Bailey Bridge hmasa ber tur a ni.

Inkhawm hi Er. R. Lalrintluanga, Chief Engineer, Roads, PWD chuan lawmthu sawiin a khar a ni. He programme ah hian Serchhip leh Thenzawl atangin khawtlang leh tlawmngai pawl hruaitute bakah Serchhip DC Pi Sangchin Chinzah leh district office hotulu te an tel a ni.