589/2024-2025

Dated Aizawl, the 28th May, 2024: Vawiin khan Chief Minister Pu Lalduhoma chuan Melthuma chhiatna thlenna hmun leh Kanan veng thlanmual te a tlawh.

Zing lamah Chief Minister hian Aizawl District Emergency Operation Centre (DC Conference hall) a pan hmasaa. Hetah hian Disaster Minister Pu K. Sapdanga, Chief Secretary Dr. Renu Sharma leh official pawimawh dangte nen hmalak dan tur an sawihova, district hrang hrang DC te biain chhiatna an tawh dan an zawt a. Chumi hnuah Chief Minister hian he chhiatna tuartute chhawmdawl nan sawrkarin Rs. 15 crore a ruahman thu leh nunna chan te chu sawrkarin Rs. 4 lakh theuhva a ral tur thu a puang a ni.

He thu a puan zawh hian Chief Minister hian chhiatna tuartute tan te, chhanchhuahna hna thawktute zawng zawng tan te tawngtaina a nei a, chumi zawhah Disaster Minister Pu K. Sapdanga leh official pawimawh te nen Melthum lam a pan nghal a.

Melthum Presbyterian Kohhran Hall-a Post Mortem Examination tih mek ruang lakchhuah tawh 12 te chu Home Minister nen hian puanin an tuam a, ruang lakchhuah tawh zinga Mizo pariat te chu Pu K. Sapdanga hian sawrkar ralna (ex gratia), a hmahruai atan Rs. 200,000 theuh a hlan a ni. Mitthi te aiawh hian Melthum Local Council Chairman Pu Saihmingliana'n a dawng a ni. Sawrkar hian mitthi te hi Rs. 400,000 theuhvin a ral dawn a, tuna an pek bak a dang hi chu chhiatna report engkim a fel fai hnuah hlan leh tur a ni ang. Non-Mizo thi te erawh hi chu thil tul te tihfel a nih hunah an bank account ah thunsak tur a ni ang. Tin, ruang la hmuh loh te pawh lakchhuah an nih veleh ralna hmahruai hi pek nghal mai theihin DM & R Department chuan ruahmanna a siam fel sa vek a ni. Chief Minister hian Melthum YMA hruaitute hnenah thingpui lumna tur Rs. 50000 a hlan bawk.

Chief Minister, Home Minister, bialtu MLA Baryl Vanneihsangi, Minister, MLA awm ang ang te leh Central YMA hruaitute nena inkawm hona Melthumah hian an nei nghal a.  Hma lak zel dan tur te an sawiho a ni. He hunah hian Chief Minister chuan, thihna tuartute a tawrhpui thu leh chhiatna tuartu zawng zawngte a lainat thu a sawi a. Chhanchhuaktute hnathawh ropui tak chu fakin lawmthu a hrilh a ni.

A hmuna chhanchhuaktute sawi danin Melthum bikah hian in palia awm Mi 24 a chhilh niin an hria, an zinga 2 hi nung damin chhanchhuah an ni. Mi 22 te zinga 12 lakchhuah tawh an ni a, an zinga 4 hi non mizo an ni. Midang 10 vel la zawn mek an ni, mizo 7 vel an la awm rin a ni.

Hlimen ah hian in hnih a hnawl bawk a, mitthi 3 hmu tawh niin an zinga pahnih hi Mizo an ni a, pakhat hi non Mizo a ni. La hmuh loh non Mizo vek 3 an la awm nia hriat a ni. Hlimen panna kawng a chian loh avangin Chief Minister hian a hmun a va thleng ve rih ta lo.

Tin, Falkawnah mi pahnih an thi nia sawi a ni bawk a, ruang pakhat hmuh tawh a ni. Salem Veng ah pathum thiin ruang hi pahnih lakchhuah tawh an ni.

Melthuma chhiatna hmunhma a tlawh hnu hian Chief Minister hian Kanan Veng thlanmual lam a pan leh a. Thlanmuan min senghawia hnatlang te thingpui lum nan Rs. 50000 a hlan leh a ni. Kanan Veng thlanmual minah hian thlan 51 vel a chhia niin an sawi a, a theih ang angin official leh mi tlawmngaiten a senghawi hna an thawk mek a ni.