3645/2022-2023

Aizawl, 21.02.2023: Chief Minister Pu Zoramthanga chuan Chin National Day vawi 75-na puala Vanapa Hall-a programme buatsaih chu khuallian niin nizan (20.02.2023) khan a hmanpui.

Chief Minister chuan Chin National Day kum 75 na lai a thleng chu lawmawm a tih thu a sawi a. Ramchhung buai avanga Myanmar rama Chin unau chengte'n mahni sahimna zawnga an ram an tlansan a ngai chu pawi a tih pui thu sawiin, an lo luh tirh kha covid19 hripui len nasat zual lai nen a in nang chu vanduaithlak a tih chu a sawi a. An tan Mizoram chhunga chengte chuan theihtawp an chhuah thu leh, Myanmar rama remna leh muanna a awm leh ngei an beisei pui thu a sawi a. Pu Zoramthanga chuan harsatna te hi Pathian remruat vek a nih avangin tunah chuan hrethiam rihlo mah ila beiseina nen hmalam hun thlir phawt a tul chang a awm thu a sawi a. Zohnahthlak te kan inpumkhatna leh inunauna chu chhawm nun zel pawimawh a tih thu a sawi.

He hunah hian former Chin State Chief Minister Pu Salai Lian Luai leh former Chin State MP Dr. Naih Tam Maung te hnen atangin thusawi ngaihthlak ni bawkin, Mizoram sawrkar leh mipuiin raltlante an lo tuamhlawm a an lo puihna zawng zawng chungah lawmthu an sawi a. CYMA, MZP, MSU, ZORO leh Manipur Kuki Inpui aiawhin thusawi ngaihthlak a ni bawk.