4123/2025-2026

Chungtlang the 23rd January 2026: Vawiin khan Chief Minister Pu Lalduhoma chuan Chungtlang khuaa rubber chingtute huan a tlawh a. An hmalaknate enpuiin, Chief Minister Rubber Mission hmanga hmalak zui zelna tur a en bawk. Pu Lalthansanga, Minister, LR, S & WC chuan a tawiawm a ni.

Chief Minister hian Tut lui thlengin Chungtlang rubber hmun hi a fang a, hmun remchang atangin W. Phaileng rubber hmun a thlir a. Chu mi hnuah Darkhuang zaua rubber huanah rubber chingtute nena inkawm khawmna an nei leh a ni.

He hunah hian Chief Minister chuan, Chungtlang khua chu rubber ngah khua in ni a, vawiina hetiang hun kan hmang pawh hi a inhmeh hle. Rubber hi kan rama tualto thing a ni a, sorkarin a buaipui tan hun erawh chu 1982 vel atangin a ni. Sorkarna kan chelh hma zawng khan scheme hrang hrang atanga lo chin tawh Hectares 3025 vel a awm a, mimal chingtu an awm nual bawk a. Mizoramah hian Hectares 50,000 vela zauah rubber hi a chin theih niin kan hria a, CM Rubber Mission hmang hian kum 5 chhunga Hectares 11,500 a zaua chin khah kan tum dawn a ni, a ti a. A sawngbawlna khawl thar 100 leina kan approve tawh a, kumin hnai huna hman theih hman kan tum, tiin sorkar hmalakna tlangpui a sawi a. A ching tura thlanten theihtawp lo chhuah ula, sorkar pawhin kan theihtawp kan chhuah dawn a, he mission hmang hian rubber tharchhuak tam ramah Mizoram hi siam i tum ang u, tiin a sawm a ni.

Pu Lalthansanga, Minister pawhin thusawiin, Chief Minister Rubber Mission hi a tobul atangin Pathianin mal a sawm a, a kal tluang hle a. Nikum lamah pilot phase kan kalpui a, kung nuai li singnga kan phun fel tawh a. Kuminah nasa zawkin kan bei leh dawn a, he mission hi a hlawhchham thiang lo tih hi kan ngaihdan a ni, a ti. Mizoram cluster lian ber chu Chungtlang hi in ni mek a. In vannei chho zel dawn tih a chiang a, a huan neitute leh siam thar mekte pawh lo tang sauh sauh ang che u, tiin a chah.

Pu Malsawmthanga, President, Chungtlang Rubber Producer Society chuan an society dinhmun report a pe a. CM Rubber Mission phase 2 hnuaiah Chungtlang, chhungkaw 105 chenna hian hectares 95 an hmu a, phase 2 atanga a dawng tam ber pathumna an ni a, tunah hian lo an vat chho mek a ni. CM Rubber Mission Phase 2 ah hian ram hectares 2575 a zauah rubber kung nuai sawm pakhat chuang phun a ni ang.

Chungtlangah hian kum sawm liam taah khan rubber chin tan a ni a, kum 75,000 vel an phun a, an dam kim vek lova. Kum 2024 atangin kung 30,000 vel an hnai tan a, khawl an indaih loh avangin an rubber zawng zawng hi an la hnai thei lo deuh nia sawi a ni a. Nikum 2025 chhung khan an khua hian rubber atangin Rs. 70 lakh vel an lalut a ni.

Sorkar chuan an rubber huan kawng hi tun hnaiah a siam thatsak a, concrete pavement-a siam zuina tur Rs. 50 lakh a pe bawk. Tin, hmun hrang hranga rubber chingtute tan khawl 100 lei turin hmalak mek a ni.

Inkawm khawmna hi Pu David Rosangpuia, VCP in a kaihruai a, Upa Lalridema'n hunserh a hmang a, Pu K. Hrangzuala, President, MIRSO chuan thu a sawi bawk.