2073/2024-2025

Dated Aizawl, the 14th September, 2024: Vawiin khan Tourism department hnuaia tour operator pakhat, Evergreen Tours & Travels leh Chungtlang Lo Zawh Organising Committee ten an buatsaih Chungtlang Zau Lo zawh chu Chief Minister Pu Lalduhoma'n a hmanpui a. Pu Lalthansanga, Land Resources, Soil & Water Conservation Minister, Pu PC Vanlalruata, Agriculture & Farmers Welfare Minister, Pi Lalrinpuii, Tourism Minister leh Pu Lalmuanpuia Punte, Adviser to CM te leh official thenkhatten an tawiawm.

Thu a sawiinaah Chief Minister chuan, Rubber ching tam khua in ni a, kalphung thar mipui sawrkar hian rubber hi kan ngaihpawimawh avangin Chief Minister Rubber Missions kan kalpui tan a. In khuaah hian hmalakna tam tak kan nei chho zelin a rinawm. In eizawnna lam enkawltu department Minister ten vawiinah in mamawh te, in harsatna te a hmun ngeiah an rawn hmu a, hei hian rah tha a chhuah zel ka beisei. Kan flagship programme Handholding Scheme hi tun thla hian hawn hman kan tum a, chutah chuan Chief Minister Special Scheme a awm dawn. Hmalakna tur a zira cheng nuaih khat thleng dawn theihna tur a ni. Tin, loan cheng nuaih sawmnga thleng puk theihna a awm dawn bawk a. Chutah chuan sawrkar hi guarantor-ah a tang ang a, a thawk thate chu loan interest zawng zawng pawh kan tumsak bawk ang. Hetiang hmalakna hi India rama kalpui thei awm chhun kan ni dawn a ni. Mipui sawrkar kan nih ang ngeiin tumah thlei bik nei lovin, a ti tak tak tur an nih phawt chuan kan Handholding Scheme hi an dil thei ang, tiin Mizoram hmasawnna tura sawrkar ruahmanna a sawi a. Mipuite taihmakna ram, hlawhtlin tuma bei tak tak tamna ram hi ram changkang leh hmasawn an ni zel a. Chutiang mi te chu a tahtawlin an banah kaiin kan khaichhuak dawn a ni. Kan hlawhtlin ngei kan ring. Tin, kan sawi tawh thin ang khan thlai thar pali kan thlan te kha a rate kan puan ang khan sawrkar chuan support price a pe dawn a. Tuten emaw sawi pawr an lo tum a nih pawhin lo awih suh u. Sawrkar chu a dinna ngaiah nghet takin a ding reng a ni, a ti.

Chief Minister tawiawmtu Minister te leh Adviser to CM te pawhin thu tawi sawina an nei bawk.

Pu Vanlalpeka, VCP Chungtlang, Lo Zawh Organising Chairman ni bawk chuan Lo zawh programme an siam theih nana thawhpuitu Tourism Department leh an hnuaia Tour Operator Evergreen Tours & Travel chungah te, Agriculture leh Sericulture Department chungah te lawmthu a sawi a ni.

Chungtlang hi Mamit district, Reiek thlanga awm a ni a. Chhungkaw 100 vel an cheng mek a. Eizawnna lamah Lo nei mi an la ni deuh vek a, an khaw ram tlak lama Tut lui phaiah chhungkaw 80 velin Rubber kung 50,000 chuang an nei mek a, Mizorama Rubber Cluster lian ber niin an insawi. Chhungkaw 70 vel chuan an hnai tan tawh nghe nghe.