Mizoram Chief Minister Pu Lal Thanhawla chuan Mizo thalaiten Civil Service Examination-a hlawhtlinna nei tura an inbuatsaihna atan MYC-ah Cheng Nuai 120 a pek belh a, heng bakah hian MYC Chairman MLA Pu Joseph Lalhimpuia chuan Alternative Learning System (ALS) te ruahmanna lo siam puiin Corporate Social Responsibility (CSR) atangin Mizo thalaiten online coaching an kal theihnan Cheng Nuai 170.74 a sawi chhuak bawk. 

Vawiin khan MYC Chairman hovin a pisaah Commission Member tharte Dr. Tawnenga, Prof.J.Zorema leh Pu Lalhmachhuana  te bakah MYC Nodal Department hotuten meeting an nei a. Commission Member-te chuan MYC Chairman Pu Joseph Lalhimpuia’n tunlaia India ram puma IAS (Civil Service) leh IIT-JEE & NEET Coaching  Batch thar atana inbuatsaih hun (season) leh buaipui lai a nih anga hautak lutuk lova Mizo zirlaiten Mizoramah ngei IAS (Civil Service) leh IIT-JEE & NEET coaching tha an dawn theih nan ruahmanna siama hma a la chu lawmawm an tih thu an sawi. Commission Member tharte chuan MYC hmalakna hrang hrang tha an tih thu te, MYC-in sum tam tak senga thalaite hmasawnna atana kawng hrang hranga hma a lakna leh, a bikin Central Servic/Civil Service atana ruahmanna fel tak kalpui a ni chu tha an tih thu te, mi taima leh ti tak tak peihte chu Delhi-ah Hostel-a enkawl a, IAS pawh tling ngei tura chher chhuak a, Central Service tam zawk kan neih theih nana hma lak ni se an duh thu an sawi bawk. 

MYC meetingah hian MYC hmachawp hrang hrangte thlir hona neih a ni a, hmalakna tur zingah Mizoram thalaite tana Youth Policy mumal zawk, kalphung nghet leh behchhan tur tha neih chungchangte IIT-JEE & NEET Coaching Scholarship Examination Class-XI (Science) zirlaiten Aizawl leh Lungleiah ni 14.7.2018 chhunga an hmachhawn turte, IAS Coaching Scholarship Examination hi ni 21.7.2018 a Aizawl leh Lungleiah buatsaih a nih tur ruahmanna siam chungchang te leh Staff Selection Commission (SSC)-in Central Armed Police Forces Constable lak a tumnaah pawh Mizoram thalaite tan District tinah MYC chuan SSC CAPF (Constable) Recruitment 2018 atan hian Pre-Recruitment Training buatsaih turin an ruahmanna awm mek thu chungchangte sawi lan a ni bawk. 

Commission meeting chuan kum 2018 hi ‘Mizo Thalaite Sipaia Luh Runpui Kum’ atan an puang bawk a, hemi atan hian kum 2018-a Mizorama Indian Army Rally neih tur pawh Headquarters Recruiting Zone, Shillong-ah MYC Chairman ngenna angin, October 2018 thla chawhma lamah buatsaih beisei a ni.