Vawiin khan Chief Minister Pu Lal Thanhawla, Cooperation Department enkawltu Minister ni bawk chuan Mizoram Cooperative Apex Bank Limited inkhawmpui vawi 24-na, Vanapa Hall-a buatsaih chu khuallian niin a hmanpui. 

Chief Minister Pu Lal Thanhawla chuan Mizorama Cooperative din tirh chanchin te sawiin tun hma lamah chuan cooperative movement leh society te hi a kal tur anga a kal thin loh avangin a hlawhtling vak lo thin a.  Mahse tunah chuan kan society te enkawlna hi a changtlung tawh a, inkaihruaina dan felfai tak kan zawm tlang a, hengte avang hian cooperative society te hi a hlawhtling chho mek zel a, inkaihhruaina dan kan zawm leh zawm lohah a hlawhtlinna hi a innghat a ni tih kan hre tlang hi a lawmawm a ni, a ti. Mizoram Cooperative Apex Bank Limited chu sum puk tirna leh khawlna Credit Institution pawimawh tak a nih thu te, Mizoram hmun hrang hrangah Branch 17 nei tawh in, mipuite tten tangkai takin an lo hmang tawh tih sawiin pawl leh Kohhran pawhin tangkai tak a kan chhawr a, Tangkai leh zuala mipuiten an hman theih nan a thawktu atangin an member te leh mipui mimir ah inzirtirna (education and training) ngaihpawimawh a tul thu a sawi bawk. 

Bank te sum enkawlna leh mipuia an sum thehchhuah tehfung Cash to Credit Ratio (CD Ratio) chungchang sawiin Mizorama bank awm mek ten CD Ratio hi RBI phut aia hniam fe an neih thin chu ti sang turin vawi tam tak khauh takin kan hrilh thin a chutih laia Apex Bank in RBI phut ang CD ratio an pha hi a lawmawm a. An balance sheet atangin an thang ani tih a chiang a, ramin kan bank neih a ni a, hma a sawn zel theih nan duat tak leh dik taka kan enkawl zel a ngai a ni,  a ti. Mipui mimir tan tunlai banking technology an chhawpchhuah mek chu lawmawm a tih thu a sawi a. National Coopertaive Development Corporation (NCDC) chu Mizoram pawhin tangkai takin a hmang mek tih sawiin kuthnathawktute hamthatna tur bera din anih angin nasa takin hma an la a, tangkai leh zuala hemi kaltlang hian kuthnathawktu hamthatna leh an hlawkna tur kan ngaituah tlan a tul a ni, a ti. 

Cooperative Movement chungchang a sawizelnaah Chief Minister chuan Mizoram ang ziak leh chhiar thiam tamna, hnam changkang awmna leh tawng khat hmang state ah cooperative movement hi economy intodelhna atan leh ram than zelna atan rahbi pawimawh tak a ni thei a. Sawrkar nghenchhan lova ei leh bara intodelhna leh sum leh pai dehchhuahna kawngah cooperative movement hi kan tangkaipui thei a mahse engkim hi rinawmna leh langtlang taka kan kalpui a ngai tiin inkhawmpui hmang cooperative society member te chu an thawhna leh society an enkawlna kawngah rinawmna, dikna, taihmakna leh Pathian tihna nung nen thawk turin a fuih a ni. 

MCAB Limited General Assembly hi Pi T. Lalmuanpuii, Chairman, MCAB Limited in kaihruaiin Bank chanchin, tunhnaia hmasawnna an neih te, an than chhoh dan te, hlawhtlinna an neih te leh an hmachhawp te sawiin lawmthu a sawi a. Rev. Dr. K. Lalrinthanga, Executive Secretary, Baptist Church of Mizoram, Aizawl Area in hunserh a  hmang a. Pu Lalzuahliana, CEO, MCAB Limited hnen atangin report ngaihthlak a ni a. Pu Laldingliana Ralte, Vice Chairman, MCAB Limited in lawmthu sawiin Assembly hun thawhkhatna a khar a. Chawhnu khan Palai Rorelna neiin Agenda pharh te an sawiho a ni. 

Mizoram Cooperative Apex Bank Limited hi kum 1982 a din niin tunah hian Mizoram pumah Branch 17 an nei mek a. Board of Director 11 neiin, hnathawktu 163 an awm mek a. Kum 2014-15 a hlep cheng nuai 389.79; kum 2015-16 a hlep cheng nuai 614.65 leh kum 2016-17 ah hlep cheng nuai 624.16 an nei a. 2015-16 a an Deposit(sum dahluh) tling khawm chu cheng nuai 59202.46 niin hemi hun chhungin an CD Ratio hi za zelah 67.63 a ni a. 2016-17 a an Deposit(sum dahluh) tling khawm pung chho cheng nuai 72406.26 a tling a, an CD ratio hi hemi hun chhung hian za zelah 58.43 a ni a.  India ramah cooperative bank te zingah Information Technology Audit nei thei awmchhun an ni.