Chief Minister Pu Lal Thanhawla chuan vawiin khan Zarkawta LPS building-ah Cricket Association of Mizoram Office tur a hawng. Office tur hi Zarkawt Police Point bul, Pu Lalrochuanga Pachuau enkawl building chhawng chung bera awm a ni.

Hawnna inkhawm tawi, urhsun taka neihah Chief Minister chuan Mizoramah cricket hi kan uar chhoh deuh deuh angai a ni tiin, eizawnna tling anih mai piah lamah hausakna a tling a ni a ti a. Cricket lama hmalatu ten a game chawikan nana an inpekna nasa tak chu fak tlak a tling tak meuh a ni a ti a. Board of Cricket Control (BCCI) a associate member ni thei tura thil pawimawh pakhat, office neih chu tunah hawn theiha a awm ta chu a lawmawm hle a ni a ti.

Chief Minister chuan affiliation dila BCCI hotute alo kawm tawhna thin ah, chona angin,’BCCI associate member a min dah theih chuan kum 5 chhungin world class cricketer kan rawn thawhchhuahpui thei ang’ tia alo sawi tawh thin thu a sawi a. CAM in President ni tura an dah chu tlinglo hle a a inhriat thu sawiin, Pathian kaihhruaina avang erawh chuan tunah hian kan tan kawl a eng tana a lawmawm hle a ni a ti a. Cricket hi Mizote thiam chi leh khelh theih chi a ni a, tih tak zeta tan kan lak chuan hlawhchhamna tur a awmlo a ni a ti.

Chief Minister chuan CAM tana office tur, hmun tha tak leh luan man tlawm bawk si LPS in a neih sak thei chu LPS chungah lawmthu a sawi bawk a ni.

BCCI hian tun thla Septembera Kolkata a working committee an neih turah CAM in affiliation an dilna chungchang ngaihtuah tur zingah a tel nghe nghe a ni.

CAM office hi Thawhlehni, Ningani leh Zirtawpni apiangin tlai dar 4:00 atanga dar 6:00 chhung hawn thin a ni ang.

CAM Office hawnna inkhawm hi Working President Pu Lalrochuanga Pachuau in a kaihruai a ni.