4166/2025-2026

Aizawl the 27th January 2026: Vawiin khan Chief Minister Pu Lalduhoma chuan Aijal Club, McCabe Hall-ah Mizoram CSR Cell, Planning & Programme Implementation leh UNDP India tangkawpin an siam, CSR diltu leh a petute inzawnna tur leh inthlunzawmna tur (CSR Matchmaking portal) Mizoram CSR Connect chu a hawng. Pu Lalthansanga, Minister, EF & CC chuan Chief Minister hi a tawiawm a ni.

A hawnna thu sawiin Chief Minister chuan, Mizoram CSR Connect a puitlin theih nana thawktu UNDP India, Planning & Programme Implementation leh CSR Cell te chungah lawmthu a sawi a. Kum 2023-24 CSR data atanga a lan danin Mizoram chuan India rama CSR hman chhuah zawng zawng 0.06% chauh a hmu a. CSR hmangin hmasawnna hna lian leh tangkai tak tak a thawh theih avangin kum 2024 June thla khan Chief Minister Office-ah CSR Cell kan din ta a ni. An hmalakna zarah a petute leh a diltute inzawnna Matchmaking Portal - Mizoram CSR Connect hi kan lo hawng thei ta a ni. He portal hian CSR lamah awlsamna tam tak min thlen kan beisei a, a petute tan pawha langtlang taka CSR kalpui a nihzia hriatna a ni dawn a ni, a ti.

Mizoram chu state ralmuang, eirukna tlemna, ziak leh chhiar thiam tamna, khuarei daih hmasawnna SDG lama hma la tha, mipuiten tlawmngaihna rilru pua engkim an tihna ram a nih avangin Corporate-te tan CSR hmanga luan chhuahna hmun tha a ni a. Hmalakna tur remchang a tam hle bawk a. CSR nei company leh an hnuaia Civil Society te chu Mizorama an CSR rawn hmang chhuak turin ka sawm a. An pawisa rawn sen ral tinrengte chu langtlang, awmze nei leh hlawk taka hman ni dawn tih kan tiam a ni, a ti.

Angela Lusigi, Resident Representative, UNDP India pawhin thusawiin, India leh khawvel huap pawha portal zahpuiawm lo tak Mizoram CSR Connect kan tlangzarh thei hi kan lawm a, a bultumtute zingah UNDP kan tel hi kan inchhuang a ni. UNDP hian India ramah hmalakna tam tak kan nei a, kan ngaihpawimawh chu khuarei daih hmasawnna (Sustainable Development) te, hmeichhiate chawikanna te, nungcha leh ramngaw venhimna lam te an ni a. Mizoramin hmalakna tha tak tak a neih avangin kan lawm a. Mizoram nena thawkho zel turin kan inpeih reng a ni. Hmalakna hlawhtling kan neih theih nan data dika innghat ruahmanna neih a tul a. CSR hmanga hmalaknate pawh a hlawhtlin theih nan data dik behchhana ruahmanna siam leh kalpui a pawimawh zel. Mizoram CSR Connect hian data rintlak hmanga hnathawk turin CSR petu leh a thawktute a tanpui nasa dawn a ni, a ti.

He hunah hian Pu Lalmalsawma Pachuau, Secrerary, Planning & Programme Implementation chuan kal khawmte lawmna a sawi a. Pu TBC Lalvenchhunga Adviser to CM, Mizoram CSR Cell Chairman chuan Mizorama CSR hmanga hmalak theihna langsar zualte a tarlang a, Mizoram Start-Up Mission leh corporate/ institution pahnihten an inremna (MoU) lehkha inhlanna an nei bawk. He hun hmang tur hian India ram hmun hrang hrang atangin CSR pe thei corporate aiawh te leh CSR dil thei pawl (Agency) aiawh eng emaw zat an kalkhawm a ni.

Dr. Lalrinchhana, Principal Adviser cum Addl. Secretary, Planning chuan lawmthu sawiin inkhawm a khar a ni.