Vawiin chawhma khan College of Veterinary Science & Animal Husbandry (CVSc&AH), Central Agricultural university(CAU), Selesih chuan  CVSc&AH Auditorium-ah  College dincham  lawmna leh zirlai kalchhuak tawhte intawhkhawm vawikhatna  a buatsaih a. He hun hi Chief Minister Pu Lal Thanhawla chuan khuallian niin a hmanpui a ni.

Chief Minister Pu Lal Thanhawla chuan CVSc & Ah, Selesih din a nih theih nan Mizoram sawrkar leh CAU te chu lungrual taka pen tlang thin an nih thu leh an thawhona chu tunthleng pawhin a la tha chhunzawm hle a ni a ti a. A thawktute inpekna rah leh zirlai chhuak ta te hlawhtlinna avangin CVSc & Ah, Selesih  chu India ram chhunga Agriculture University thaber te zingah chhiar tel a ni tawh a; a lawmawm tak zet a ni a ti. Central Agriculture University hnuaia din chhoh mek  Horticulture College, Thenzawl pawh tih puitlin thuai a nih theihnan hmalak chhunzawm zel a nih thu leh harsatna ching fel turin a hmunah vawi tam tak a tlawh tawh thu  a sawi a. Horticulture College, Thenzawl chu hawn a nih veleh class kalpui a nih nghal theih nan Class room lailawk tur pawh ruahman fel a ni tawh a ti.

Chief Minister chuan Mizoram innghahna, kuthnathawktute thawhchhuah ti pung turin NLUP kalpui a nih thu leh NLUP ti phuisui a, NLUP a hmala mek te tanpui chhunzawm nan NEPD kalpui mek a nih thu a sawi a. Veterinary Science & Animal Husbandry  zirchhuak tawh, mithiam rual te chuan NEDP hnuaiah Entrepreneur Development Scheme huanga rawn zuan luh tum se a tangkai tur thu sawiin. Entrepreneur-te chu sawrkar innghahna tur te an nih thu a sawi a ni.

CVSc & AH Foundation Day lawmna inkhawm CVSc&AH Auditorium a neih ah hian CAU, Imphal Vice Chancellor Prof.Premjit Singh leh  CVSc & AH Dean Dr.Kartikesan ten thusawina hun an hmang a. He hunah hian  Chief Minister Pu Lal Thanhawla’n Tribal Sub Plan Project Booklet leh lehkhabu tangkai tak tak te a tlangzarh nghal a. Tundinhmunah,  CVSc & AH-ah  hian Department 17 awm mekin  zirlai 357 an awm mek a ni.