1475/2026-2027

Aizawl the 21st July 2026: Vawiin khan Chief Minister Pu Lalduhoma chuan a office-ah a department DP & AR hmalakna enpuina (Review Meeting) a nei.

Department of Personel & Administrative Reforms hian General Service Wing, Administrative Reform Wing, Secretariat Service Wing, Civil Service Wing leh MPSC te an enkawl a, sorkar hnathawk zawng zawngte viltu a ni. 

Chief Minister chuan, hetianga a mawhphurtute kan han thukhawm a, hmasawnna tur thil pawimawhte kan sawiho hi tul ka ti a. Sorkar hna hi tluang takin kal se, kan ram hian hmasawnna hi hmu mawlh mawlh ila kan duh a, siam that ngai chu siam tha turin theihtawp kan chhuah tlang dawn nia, a ti.

Pu Udit Prakash Rai, Commissioner & Secretary, DP & AR chuan heng DP & AR hnuaia kal Wing hrang hrangte leh MPSC hnathawh dante chipchiar takin a sawifiah a. Sorkar hnathawkte kaisanna mumal zawka kalpui a tul dan te, online hmanga sorkar hnathawkte vilna te, post ruak zat leh hnawhkhah mek awmzat endikna tur rawtna an neihte a tarlang.

MPSC hian sorkar kum 2025-26 chhungin Exam vawi 142 an kalpui a, result chi 57 an puang hman a, DPC hi vawi 292 an thu a ni. Tunah hian Department zawng zawng hian hna hniam lam pawh MPSC zelin la se an duh tawh avangin MPSC tihchaka hnathawktu tam zawk pek hian kawng danga sorkar hnalakna kalpui aiin sorkar sum leh pai senso a tlem zawk a, chak taka bawhzui a tul thu tarlan a ni. 

Pu H. Lalhmingthanga, Jt. Secretary chuan Good Governance and Training Wing, chungchang sawifiahna a nei a, GGTW hi Administrative Training Institute (ATI) enkawltu a ni. 

Right to Public Services Act chu online-a kalpui niin a hman theih tawh a, Right to Public Services-ah hian tihhlawhtlin theih service chauh dah a pawimawh thu sawi lan a ni.

Mipui Aw, February ni 16, 2024 a Chief Minister-in a hawn tawhah mi 672 in an lungawi lohna an thlen tawh a, case 613 chinfel tawh niin chin fel mai theih loh, chhan harsa, hun duh rei chi hi 45 a la awm mek e-office hi Secretariat-a Administrative Department zawng zawngin an kalpui tawh bakah Department dang pakuain an hmang tawh a. Sorkar department te chu e-office hmang vek tura hriattir an ni tawh a ni.

ATI hian sorkar kum 2025-26 chhungin Training chi hrang hrang 84 an kalpui a, mi 2389 ten training hi an kal a ni. ATI hian Organised Service Officers te hi a huho zelin training pe tawh se, training an zawh rualin IIPA hi a huho vekin tlawh zel tawh se tha an ti a ni.

Heng bakah hian sorkar hnathawkte training chungchang te, fel fai zawka inenkawlna tur rawtna te, hmachhawp hrang hrang an neihte an sawi.

Review Meeting-ah hian Pu TBC Lalvenchhunga, Adviser to CM, Pu Khilli Ram Meena, Chief Secretary, Pu Vanlaldina Fanai, Commissioner & Secretary to Chief Minister bakah DP & AR hotute leh an hnuaia peng hrang hranga official pawimawhte an tel a ni.