4787/2024-2025

Aizawl, the 24th March 2025: Vawiin chawhnu khan Aijal Club Terrace Restaurant-a Mizoram Eco Fest 2025 chu Environment, Forest & Climate Change buatsaihin Eco Fest Cultural Programme hman a ni a. Chief Minister Pu Lalduhoma chuan khuallian niin a telpui a, Pu Lalthansanga, Minister, EF & CC chu khualzahawm niin Pu Lalmuanpuia Punte, Adviser to CM pawhin a telpui bawk.

Thu a sawinaah Chief Minister chuan, ramin hma a sawn zelna turah mipui sukthlek inthlakthleng (social change) hi thil pawimawh hmasa a ni a. Economist te pawhin Economic Development thlen tu zingah Social Change hi an dah chungnung hle. Mipui nawlpuiin kan ngaihdan kan thlak a tulna hi a la tam hle a. Chung zinga a pawimawh ber pawl chu kan ramngaw, kan lui leh nungchate chunga kan rilru put hmang hi a ni. Kan pi leh pute atanga ramsate kapa tihlum thin kan ni a. Tun hma kha chuan kan ram a la tha a, mihring an tlem a, an la changkang lo bawk a. Ramsate kha mihringte tana hnawk tham khawpin an tam thin. Chuvang chuan an damkhawchhuahna atan an laka hlauhawm thei ramsate kha an tihhlum a ngai thin a. Chutiang tithei mi chu khawtlang venghimtu an ni zawk thin.

Vawiinah erawh chuan mihring kan pung a, ram a pung ve si lo va, ngaw kan thiat a, ramsa leh nungchate chunga kan hmanlai ngaihdan kha kan la thlak si lo va. Mizoram chu nungchate tana ram raltiah kan chhuah a, kan nungchate chu rem hlauhawm khawpin kan suat ta a ni. He mi chungchanga kan rilru hi kan thlak loh chuan Mizoram hi reiloteah kan sawp chhe vek thei mai ang tih a hlauhawm.

A nihna takah chuan kan ram mawi tak, lui leh tlang mawi tak, kan boruak thianghlim leh a chhunga nungcha tinrengte hi khualzin hipluh theihna renchang, sum tam tak kan hailuh theihna hnar a ni a. Kan ram hi tha takin enkawl ila, Eco Tourism hlawk taka kalpui nan i hmang ang u, tiin mipuite a sawm a. CAMPA fund leh forest department-in hmalakna tur sum a neih ang ang te chu tha taka hman a tul thu a tarlang.

Chief Minister hian wildlife lama hnathawktu tha chawimawina an pek te leh Thorang Sanctuary relocation atana compensation 2nd instalment chu a dawngtu tur chhungkaw parukte hnenah a hlan a ni.

Pu Lalthansanga, Minister, EF & CC pawhin thusawiin, Chief Minister Pu Lalduhoma kaihhruai sawrkar hi Pathianin mal a sawm a, harsatna tam tak hi awlsam takin kan ching fel leh mai thin. Thorang Sanctuary huam chhunga awm S. Dampui khuaa cheng, sawn chhuah tura tih, hun rei tak insawn lo va awm te pawh, tunah chuan anmahni duh thu ngeiin tha takin an chhuak dawn a. Vairengte - Aizawl National Highway 4 lane laih turah pawh a hmalakna zarah entity pahnih hnenah compensation pek an ni dawn hial a ni. Hmasawnna dang pawh sawi tur tam tak a awm.

Forest Clearance lama buaina kan tawh tawh loh nan Development hna kalpui tur Department reng reng chuan Forest Clearance neih hmasak zel tur tia thupek tichhuah a ni ta hial bawk, tiin Chief Minister hmalaknaah hian lawmthu a sawi a. Minister hian Eco Fest puala cycle intlansiak (Uphill challenge) a lawmman dawngtute hnenah lawmman a hlan bawk.

Pu H. Lalengmawia, IAS, Commissioner & Secretary, EF & CC chuan Eco Fest an neih chhan a sawifiah a. Mipuite hnena ramngaw humhalh a pawimawhzia thehdarh a, kan forest leh wildlife te venhim hi khua leh tui zawng zawng te mawhphurhna a ni tih hrilh nawn fo hi a ni, a ti. Chief Minister-in hun a hmanpui avangin lawmthu a sawi bawk.

Pu RK Tiwari, IFS, PCCF pawhin thu tawi sawiin, Pu MZ Singson, Conservator of Forest chuan kal khawmte lawmna thu a sawi a, Pu Pee Lee Ete, Chief Wildlife Warden chuan lawmthu sawiin inkhawm a khar a ni.

Vawiin khan Eco Fest pual hian programme chi hrang hrang neih a ni a. Naktuk lamah pawh chhunzawm leh tur a ni ang.