Mizoram sorkara Anti-Corruption Bureau (ACB) leh Central Bureau of Investigation (CBI) Academy, Ghaziabad te tangkawpa Mizoram Police mi 26 te tana eiruk dona dan leh chhuina ‘Course on Anti-Corruption Laws & Investigation’ Training kharna chu vawiin khan Arya Mess, Police Hqrs. ah Khuallian Mizoram Chief Minister Pu Lal Thanhawla’n a hmanpui a. He hunah hian Minister Pu H.Liansailova, Pu P.C.Zoramsangliana, Pu Lalsawta, Pu H.Rohluna, Pu Lalrinliana Sailo, Minister of State Pu P.C.Lalthanliana, Parliamentary Secretary Pu Lalrinmawia Ralte, DGP Pu Lalrokhuma Pachuau te pawh an tel.

 

 

Khuallian Chief Minister chuan police officers te tan eiruk dona leh chhuina lama training buatsaih tura ACB leh CBI hmalakna chungah lawmthu a sawi a, sorkarin eirukna a tihrem tumna kawnga hamnrua tangkai tak a nih a beisei thu a sawi a. Eirukna a hluar chuan ram sum leh pai dinhmun a khawih chhia a, ram leh mipui hmasawnna a dal thin a ni tiin Pu Lal Thanhawla chuan Mizoram Police ten eiruk chhui dan leh report ziah dan an thiam phawt chuan sorkar tan pawhin kut tling lova sum hailutte chhui leh hrem kawngah hmalak a ti awlsam dawn a ni, a ti. Sorkar hnathawk zingah hnathawh dan, hun vawn dik leh mahni inthununna kawngah inthlahdahna a nasa hle a hriat thu leh Police te pawhin an duty kawng hrang hrang bakah VIP zah entirna kawng thleng ah pawh an inthlahdah nia a hriat thu Chief Minister chuan a sawichhuak a. Sorkar chuan khauh leh zuala dan leh thupek kenkawh a tum avangin police te an intuaithar a tul a, an mamawh ang zela training pek an ni ang, a ti a. Training zo police mi 26 te chu ram leh mipui tana an hnathawhnaah theihtawp an chhuah zel theihna turin duhsakna a hlan.

ACB Director Pu P.Kamraj chuan CBI-a eiruk hnuchhui lama mithiam R.P.Kaushal, SP (Trg) leh J.C.Kaushal, Inspector te state police training pe tura rawn kal chungah lawmthu a sawi a, CBI-in hetianga state ngeia kal a state police te training an pek vawi khatna a ni, a ti. Sorkarin ACB ngai pawimawha, a hma aia 60% velin a tih chak tawh thu sawiin Pu Kamraj chuan eirukna chhui chu police te tan hna hautak leh chona lian tak a ni a, ACB staff ten an hnathawhnaah phur zawk leh thahnemngai zawka an thawh theihna turin Special Incentive Allowance pawh ngaihtuah sak an tum thu a sawi bawk. ACB tichak leh zual turin Law Officer, Engineer leh Auditor post te an mamawh tur thu Chief Minister hnenah a thlen nghal a ni.

CBI SP (Trg) Pu R.P.Kaushal pawhin thu sawiin he ni 3 awh training hi CBI-in a bik taka Mizoram Police te tan an duan sak a ni, a ti a. Eiruk chhuina kawngah Mizoram police te chu engtiklai pawhin an puih duh thu a sawi bawk.

Vawiina ‘Course on Anti-Corruption Laws & Investigation’ Training kharna inkhawm-ah hian Khuallian Chief Minister chuan training zo mi 26 te hnenah Certificate a hlan nghal a ni. Mizoram sorkar chuan eiruk dona leh chhuina kawngah leh sorkar inrelbawna felfai leh langtlang a siam theihna turin Anti-Corruption Bureau hnuaiah post 33 zet a dah belh tawh a, chungte chu Director (IGP Rank) 1, Dy. SP 4, Inspector 4, Sub-Inspector 4, Sub-Inspector (M) 3, Sub-Inspector(Steno) 1, Asst. Sub-Inspector 2, Asst. Sub-Inspector (M) 3, Head Constable 2, Constable 10 leh IV Grade 2 te an ni.