Agriculture Department (Crop Husbandry) ina a buatsaih, Farmers’ Meet 2013 vawiina Vanapa Halla neihah Chief Minister Pu Lal Thanhawla chuan Khuallian niin a hmanpui.

Chief Minister chuan loneimi leh kuthnathawktute hi khawvela mipawimawh berte an ni a, an tel lo hian ram a kal theilo a ni a ti a. Ei leh bara kan intodelh theihna tur kawngah min ti phurtu atan ‘Buh Thar Tam Kum’ leh ‘Kuthnathawktute Ni’ te anmahni puala kan hman tawh thu te a sawi a. India in zalenna a hmuh hnua sorkar hmasa ber pawhin kuthnathawktute chu ngaihpawimawh berah neiin an tello hian ram a ropui theilo a ni tih hriain, an dinhmun chawikanna kawngah nasa takin hma ala a ni a ti a. Mizorama kuthnathawktute pawh sorkar-in lei rem rah tira, eizawnna ngelnghet siam sak turin NLUP a kalpui a, tun kum nga chhung hian chhungkaw 1,35,000 tuam turin sum pawh a awm vek a ni a ti. Chief Minister Pu Lal Thanhawla chuan NLUP kalpuina tur hian sorkar department chanvo sum pakhatmah pawh pen anih loh thu sawiin, chutiang sawi an awm anih chuan dawt an sawi a ni a, itsikna tawngkam mai a ni a ti.

Chief Minister chuan sorkar-na siamtu MLA 32 te hi Mizo mipuite tawngtai chhanna an nih avangin thil diklo an tih lohna turin lepse ngamin an kal a, eirukna leh corruption chi hrang hrang lakah fihlim turin fimkhur taka an kal thu a sawi a, midang zawng zawngte pawh hetiang lakah fihlim tir tumin midangte tana malsawmna thlentu nih hi an duh ber a ni a ti. Thiamna lamah chuan mipangngai ve mai anih thu sawiin, Pu Hawla chuan mithiamte thluak vai vir chungin hmasawnna kan hmu thei tih kan hria a ni a ti a. Chuvangin agiriculture leh horticulture bikah kuthnathawktute chu mithiamte kaihhruai tirin, tlangram lo neih pawh 48% velin a tlakhniam phah tawh a, hlawk zawk leh scientific zawkin NLUP hmangin lo neih kalpui mek zel a ni a ti. Chief Minister chuan kan awmna apiang hi Pathian-in A rawngbawl tura min dahna a ni a, tui taka thawh chu kan mawh theuh a ni a a ti a. Tui taka kan thawh phawt chuan dikna, rinawmna, taimakna leh tumruhnain a zui ngei ang tiin, kan thawhchhuah leh kan hlawh lak zat te a inphu em tih kan inenchian fo a ngai a ni a ti.

Khualzahawm Pu H.Liansailova, Agriculture Minister pawhin thusawiin, kan thil tih reng rengah hmathlir tha tak kan neih a tul thu a sawi a. Hei hi tihlawhtling turin ruahmanna fel tak siam a hmala in, tuchhuan lokal zel turte tana chhenfakawm siam hi kan tum a tha hle a ni a ti a. Loneitute zingah mi taima, hlawhtlin tum tlat tam tak an awm tih sawiin, Pu Liansailova chuan lawmman la tlak veka hnathawk an ni a ti a. Pu Lal Thanhawla’n kuthnathawktute khaichhuahna tura hmathlir tha tak a neih chu hriatpui a, tumruhna leh chhelna nen thawk turin a fuih a ni.

Farmers’ Meet-ah hian district hrang hrang atanga Oil Palm ching hlawhtling bik thlanchhuahte leh Buh thar tam te hnenah kum 2012 chhung atan lawmman pakhatna Rs.20,000/- leh Citation, pahnihna Rs.15,000/- leh certificate leh pathumna Rs.10,000/- leh certificate theuh hlan a ni a. Pi Kaphliri, Bungkawn, Aizawl hnenah kumkhat 2012 chhunga a lo ah buh, vaimim, purun leh antam, zikhlum cheng nuai hnih chuang man a thar avangin Special Award hlan a ni bawk.

Inkhawm hi Pu Lalram Thanga, Principal Secretary, Agriculture in a kaihruai a, Plan 11th chhunga Mizoram mamawh buh thar chu 20% chauh anih laiin, Plan 12th chhung chuan buh metric tonne 1,06,000 (60%) thar tum anih thu a sawi.

Farmers’ Meetah hian district tin atanga loneimi 400 tel tura thlan chhuah zingah mi 336 an kal a ni.