All Mizoram Farmers Union (AMFU) buatsaih, Champhai District Farmers’ Meet cum NLUP Awareness Campaign chu Chief Minister Pu Lal Thanhawla chuan nimin khan Champhai Town Hallah a hmanpui. He hun hman hma hian CHANEM inhnuai bera Crop Exhibition, AMFU huaihawt chu hawngin, Chief Minister chuan hetiang thlai thar tha hi khawvel hmun dangah a awm bik lovang tiin, din khawchhuah nan erawh tam tham tak thar chhuah a ngai ang a ti.

 

 

Chief Minister chuan NLUP hi a hlawhchham kan phal dawn lova, a hlawhtlin ngei ngei theihna turin uluk takin kan kalpui daw a ni a ti a. Diklo taka hmangte chu rulh tir an nih tur thu sawiin, a mamawh zual te leh tih tak taka thawk tur, midangte entawn theih tur te hnenah pek hmasak an ni ang a ti a. Kolasiba hetiang programme neih tumah kuthnathawktu te kal an that em avangin NLUP hlawhtlin nan beiseina sang tak a neih thu leh a phur phah hle thu a sawi a. AMFU hian a phur pui chu lawmawm a tih rualin, an duh anga kalchakpui a theih lo chu sorkar lam a inpeih theih lawk loh vang a ni a ti a. Sorkar chu muangin lang mahse a muanglo a ni a ti. Pu Hawla chuan Prime Minister Dr Manmohan Singh leh Centrala mithiam ten NLUP chu  tha an tih thu sawi nawnin, state dangte entawn tir an duh avangin a hlawhtlin loh an hlau hle a ni a ti a. Chuvangin Sorkar chuan fimkhur taka kalpui a tum a, uluk takin a vil reng dawn a ni a ti

Chief Minister chuan sorkarin a bik taka khua emaw tu emaw siam a tum loh thu sawiin, Zoram pum hi a rual thei ang bera hmasawnna kalpui a ni ang a ti a. A ruala kan zavaia leirem kan rah tlan a, khaw eng kan hmuh tlan hi kan tum ber a ni a ti a. Khawtlang nun tluchhe tawh tak leh office kalphung mumal lo tak siam that hna sorkarin a thawh tur hi a kheng hle a ni a ti a. A siam thatna turin huaisen takin dan lekkawh a ni ang a ti a. Rorelna dik, rorelna tha leh rorelna fel a awm theih nan dan a lal ber dawn a ni a ti. CBI pawh a tul huna koh theih mai turin kawngka bulah kan dah reng a ni a ti a. Chutiangin ACB pawh a tak taka hna an thawh theih nan training pek mek an nih thu a sawi bawk a ni. Sorkar hnathawk siam that ngai, insiam tha duhlo te leh ven theih loh te chu dan in a siam tha anga, dan in ro a rel mai ang a ti.

Agriculture Minister Pu H.Liansailova pawhin thu sawiin, AMFU hian sorkar hi an thawpui mai nilovin an thawh sak zawk nia a hriat thu a sawi a. Agriculture hi thangthar ten eizawn hmanga, tunlai ber ber hmanrua hian hma hruai se a duh thu a sawi a. Ram siam that tura hma kan laknaah sorkar leh mipui ten inrintawnna kan neih a tul a ni a ti a. NLUP hi kuminah bul tan tum nimahse hmansual duhna thinlung a len thin avangin krismas hma hi chuan sem a ni loving a ti. Pek hmasak leh pek hnuhnunte pawh an awm ang a ti a. NLUP hi pawisa tam vanga hlawhtling tur a nilo tiin, rinawmna, taimakna leh tumruhnaah a hlawhtlinna chu a innghat zawk a ni a ti.

AMFU President Pu R.Lalduhawma chuan NLUP scheme hi a tha vek a,kan lo dawnsawn dan turah kan rilru kan lo insiam lawk a ngai a ni a ti a. NLUP chu kuthnathawktute chawikanna tur anih avangin kan ta tur dik tak a ni a ti.

Champhai North bialtu MLA Pu T.T.Zothansanga pawhin thusawina hun a hmang bawk.

Inkhawm hi Pu HKL Thanga, Vice President, AMFU Champhai District in a kaihruai a ni.