4341/2024-2025

Dated Aizawl, the 19th February, 2025: Vawiin khan Ainawn Venga Federation of Mizoram Goverment Employees & Workers te bultuma sak mek Federation Enclave Sample Flat leh Community Centre chu Pu Lalduhoma chuan a hawng.

Chief Minister chuan, Federation Enclave chu kan ram hmel thar a tling chho dawnin ka hria a, ka lawm hle a ni. Aizawl hi a tawtin inkalpawhna leh vantlang hmuhma thar siam tura thil tih a harsa tawh hle a. Vawiina FMGE&W leh Blue Mountain Co te hmalak ang hian,  Aizawl chheh vela inhmun neitute leh developer te tangkawpin housing complex tha tak tak, mipuite lei phak tur ngei ni si, han din nual thei se, Aizawl hmel chu nasa takin a danglamin kan changkanpui ngei ang. He Housing Complex hi tluang takin puitling thuai se ka duhsak tak zet a ni, a ti.

Pu Hmingchungnunga, Chairman, Mizoram Government Employee Housing Society chuan kal khawmte lawmna thu a sawi a, Er. R. Lalrammawia, President, FMGE&W pawhin thu a sawi bawk. Mizoram sawrkar hnathawkten transfer and posting vanga chenna in din kawnga harsatna an tawh thin chhawk zangkhai a, an tana loan hmanga awlsam taka in saksa lei tur an neih theih nana buatsaih a nih thu an tarlang. A dinna hmun ram hi sawrkarin a pek a ni. Kum 2027 ah hna hi zawh an tum dawn a, booking hi vawiin atangin an hawng tan ang. Kum khat chhung sawrkar hnathawk tan an hawng phawt ang a, chumi hnuah a duh apiang tan hawn zui a ni tawh ang.

Federation Enclave hi FMGE&W hnuaia Mizoram Government Employees Housing Society te chuan Blue Mountain Engineering & Services Limited nena tang dunin chhungkaw 350, mihring 2000 vel chen theihna tur Housing Complex hi kum 10 vel kalta atang khan an buaipui tan a. Vawiina hawn hi Complex Community Centre building niin, he buildingah hian Sample Flat an dah nghal a. Chief Minister hian Sample flat hi a en kual bakah heng flat sak tur lei duh tute tana hauh theih hun (mass booking) a puang nghal bawk.

A man tur tuna an rate dinglai chu a tlangpuiin (approximate rate) 2BHK hi Rs. 47 lakh vel, 3BHK hi Rs. 60 lakh vel, 4BHK hi Rs. 77 lakh vel a ni.