864/2022-2023
Aizawl the 10th June, 2022: Chief Minister Pu Zoramthanga chuan vawiin khan FEMSE (Federation of Mizoram Samagra Employees) Special Assembly 2022, Vanapa Hall-a buatsaih chu a hmanpui.

Chief Minister chuan assembly hmang tura member thehnem tak an kalkhawm chuan an tanrualna a tilang a ni tiin fakawm a tih thu a sawi a. Khawvel huap hrileng in min tlakbuak bakah ramri buai, ram kang, refugee lo lut, vawk hri leng te state in a hmawchhawn chhoh dan a sawi a. Covid hrileng in state chauh nilo, ram pum leh khawvel a nghawng avangin state in a sum hmuh tur ang a hmuh tlin loh avanga sum lama harsatna a awm chhoh dan a sawifiah a. Development hna thawhna tur sum, hmanna tur bituk sa nilo, hlawh leh thildang atana hman theih ve tur sum kan hmuh theih thin te kan hmuh tlem phah tak avanga a hmaa tih theih beisei leh tih duh te pawh a la theih vek rih loh thu a sawi. Chutiang karah chuan Chief Minister chuan FEMSE in an hlawh leh service chungchang sawrkar an lo thlen tawhte chu ngaihtuahpui mek zel a nih thu sawiin, an service chungchang chu cabinet in a la ngaihtuah tura ruahman tum a nih thu a sawi.

He inkhawm hi Sr. Vice President Pu K. Vanlalthanzauva chuan kaihruaiin, Pu Lalbiakunga, General Secretary chuan inhmelhriattirna leh sunna a kaihruai a. Kum thum vchhunga an member thi 14 te sunna hun neih a ni. President Pu R. Lalnunhlima hnen atangin thusawi ngaihthlak a ni bawk a. Chawhma inkhawm hi rorel in a chhunzawm a ni.

Federation of Mizoram Samagra Employees (FEMSE) hi kum 2019 August ni 23 khan Samagra hnuaia Association paruk (6) ten din niin, tunah hian Samagra hnuaia thawk Association sawm (10) ten Federation hi an zawm mekin, member 4500 chuang an awm mek a ni. District zawng zawngah FEMSE Sub Hqrs. din vek a ni tawh a. He federation hnuaia association hrang hrangte chu: Mizoram SSA Teachers' Association (MASTA), Mizoram RMSA Employee Welfare Association, SSA Resource Person Association of Mizoram, Mizoram Instructor Association, Mizoram Samagra Management Staff Association, Samagra Academic Support Staff Association, SEAM Marakanda, Mizoram Hindi Shikshak Sangh CAS leh Special Educator Association (Elementary) te an ni.