2402/2026-2027

Aizawl the 28th September 2026: Vawiin chawhnu khan Chief Minister Pu Lalduhoma chuan CM Conference Hall-ah Fisheries Department hmalakna review meeting a neihpui a. Fisheries Minister Pu Lalthansanga leh department official te, Finance leh DP & AR official te an tel a ni.

Chief Minister chuan, review meeting hi thil dik lo zawng chhuak tura ko ka ni lo va, hmasawnna nasa zawk kan neih theih nana a taka thawktute nena inkawmhona a ni. Chuvang chuan inpawh takin thil kan sawi ang a, hlawk taka hun hman kan tum dawn nia tiin meeting a koh chhan a sawi hmasa a. Fisheries department hmalakna leh hmachhawpte sawihona an nei zui a ni.

Fisheries Department hmalakna langsar zualte chu:

1. Tun sorkar kal mekah Fisheries Department-ah hnaruak 21 hnawhkhah a ni tawh.

2. Hmun 95 ah YMA nena tangrualin Lui humhalhna kalpui mek a ni a. YMA nena inremna hi kum hnih danah siam thar zel a ni.

3. Mizoram hian lui (water body) hi 6000 Ha a zau, lui lian 16 telin a nei mek a. Tuikhuah lian 8000 Ha a nei mek (Serlui leh Tuirial HEP) a. Natural Lake pahnih Tamdil leh Palak Dil 5 Ha a zau a nei bawk a. Sangha vulhna tur hmun hi a nei tha tawk a ngaih niin a vaiin sangha vulh theihna hi 24000 Ha vel a awm nia ngaih a ni. Chung zinga 26.3% chauh chu hman tangkai a la ni. Hetiang hi Mizoram dinhmun (data) nia hriat ni mah se Sangha vulh theihna a neih zat dinhmun (data) dik tak hi neih that dan dap tha an ti.

4. Sangha chi siam thei (Hatchery) hi tunah 14 Mizoramah a awm mek nia sawi a ni a, anniho zing atang hian empanelled supplier pawh register an ni.

5. Bana Kaih Phase-1 hnuaiah CM Special Package atangin chhungkaw 201 thawhpui an ni a, Loan hi chhungkaw 13 pek an ni a. Phase 2 hnuaiah CM Special Package hi chhungkaw 84 thawhpui an ni a, loan hi chhungkaw 5 pek an ni.

6. Sangha tharchhuah zat hi kum 2020-21 ah 4304.69 MT nia chhinchhiah a ni a, kum 2025-26 ah chuan 8020 MT nia chhinchhiah niin Mizoram mamawh za zela 58.28 (58.28 %) kan tharchhuak tawh nia ngaih a ni. Tunah hian avarage productivity per hectares hi 1.21 MT a ni a. Dil hi siam belh tawh lovin hectares khat atanga tharchhuah zat tihpun hmang mai pawhin nasa taka hmasawn thei kan ni.

7. Sangha vulhtu pawh hi 2020-21 ah mi 16,486 atangin 2025-26 ah mi 22,661 ah an pung a. Hectare khat atanga tharchhuah theih zat (Productivity per Hectares) pawh hi 2020-21 a Metric ton 0.78/ Ha/year chu 2025-26 ah Metric ton 1.21/Ha/Year ah a sang chho va. Nimahsela he productivity rate hi a la tihsan theih hle nia ngaih a ni.

8. Sangha vulhtute hi anmahni sum seng miah lovin kumin atang khan PMMSY hnuaiah Group Accident Insurance Scheme kalpuisak tan an ni a. Mizoramah sangha vulhtu mi 4302 insured tawh an ni.

9. Ngaizelah Cold Storage sak a ni a, nikum November thla khan hawn tawh a ni a. Electric supply tha zawk pek tuma hmalak mek a ni.

10. Lengpuiah Fish Farmer Training sak mek a ni a, PMMSY 2.0 hmanga Fish Marketing Centre sakna tur hi central sorkar chuan a thuphungin Rs. 50 Cr a rawn phal tawh a, Zawlnuamah Integrated Aqua Park siamna tur project duan a ni bawk.

11. Serlui B tuikhuah leh Tuirial tuikhuah te chu PMMSY 2.0 hmang veka Integrated Development kalpui tura ruahmanna siam a ni.

12. High Level Task Force on Sustainable Aquaculture & Livelihood chuan Mizoram chu kum 2030-a Sangha 20,000 MT tharchhuak turin a beisei a. He target tihlawhtlinnna atan hian PMMSY 2.0 bakah a hranpa taka duan Chief Minister Blue Mizoram Mission kalpui thaa ngaih a ni a. Department pawhin CM Blue Mizoram Mission project tur hi an duang tan tawh a, Chief Minister hian a ranglama lo peih tum turin a chah a ni.

Pu Lalthansanga, Minister chuan Fisheries Department hmasawnna tur leh hmachhawp te, harsatna kan tawh mekte Chief Minister-in inhawng taka min sawipui hi kan lawm a. Hma kan sawnpui ngeiin ka ring a ni, tiin Chief Minister chungah lawmthu a sawi a ni.