4199/2023-2024

Dated Aizawl, the 16th March, 2024: Vawiin khan Chief Minister Pu Lalduhoma chuan Zuangtui Industrial Estate-a FK Toughened Glass Factory thar leh FK Oxygen leh FK Roof, mumal taka hawng lova hun engemaw chen an lo kalpui tawh te chu a hawng.

Thusawiin Chief Minister chuan, mi tumruh leh Mizoram tihhmasawn tuma mahni thiam ang anga bei thin Pu F. Kapsanga'n Industry lama hma a lo lak tawhah lawmthu a sawi a. Vawiinah a nupui fanauten an chhungkaw hmalakna an chhunzawm zel hi a lawmawm a, an zarah Industry lamah Mizoramin hmasawnna kan hmu ṭhin. Entreprenuer ṭha te hi an hlu em em a, eng ram pawh hian entreprenuer ṭha neih tam hi an duh vek thin. Entreprenuer ṭha zarah ramin Industry ah te, Service sector lamah te hma kan sawn phah ṭhin vang a ni. Pu F. Kapsanga pawh Mizo zinga entreprenuer ṭha ber pawl a ni a, kum 1960 chho atanga bul ṭanin vawiin thlengin hma lam an la pan zel a, midang tam tak tana hna an siam bakah Mizoram siam ngei thil tam tak kan neih phah a ni. Vawiina kan factory hawn te pawh kan ramin a mamawh tak tak thilte siamna a ni a. Tluang taka an kalpui theih nan duhsakna ka hlan a, factory dang ṭha tak tak, ram dangte el phak lo neih belh zel tum turin a chah a ni. Mizoram sawrkarin Entreprenuer ṭha te a ngaihpawimawh thu pawh sawiin Hand Holding Policy in a tum ber pakhat chu entreprenuer ṭha te dap chhuaha, ding chhuak tura ṭanpui a ni a, ṭhalaiten he kawng hi rawn zawh uar sauh sauh se kan duh a ni, a ti.

Pu F. Lalmalsawma, Pu F. Kapsanga fapa leh an factory te enkawltu ber ni bawk chuan technical report a pe a. Darthlalang pangai aia tha zawk, a lo keh palh pawha mihring tana hlauhawm loh tur, darthlalang pangai let sariha chak zawk siam ve hi ṭha kan ti a. Mizoten Assam atangin kan chah ṭhin a, kan mamawh hunah a rawn thleng lo fova. Chumi harsatna sutkian nan chuan hma an la a ni. An khawl thar hian 4x8 feet thlenga lian darthlalang a tichak thei a. A khawl hi Gujarat atanga an lei a ni.

Pu F. Rodingliana, Minister, Commerce & Industry, Pu F. Kapsanga fapa pawhin thusawiin, a pa Pu F. Kapsanga'n Industry a din chhan nia a hriat chu zalen taka hna ṭangkai tak thawh nia a hriat thu a sawi a. Industry hi hna zahawm, hlawk leh ram tana ṭha si a nih avangin hnam dangte pawhin an zah ṭhin hle a ni, a ti. State dangin Industry neitute an ṭanpui nasat ṭhinzia a taka a hmuh ṭhin thu tarlangin, Mizoram sawrkar pawhin Industry lama kan ṭhan zel theih nan nasa zawka hma lak a tum thu te a tarlang bawk.

Factory thar hawnna inkhawm hi Pu Vanlalsailova'n a kaihruai a, Col. Lalhmingliana, Territorial Commander chuan Factory thar hlanna a nei bawk.

Factory thar hawnnaah hian Lalbiakzama, Speaker, Pu Lalfamkima, Deputy Speaker, Pu Vanlalhlana, Minister, Pi Lalrinpuii, Minister, Pu PC Vanlalruata, Minister, Pu Lalnghinglova Hmar, Minister of State, Pu W. Chhuanawma, Dy. Government Chief Whip, Dr. Renu Sharma, IAS, Chief Secretary, Pi Lalhmingliani, Secretary to Government of Mizoram leh official pawimawh engemawzat an tel a ni.

Attachment

  • Loading attachment...