4848/2024-2025

Aizawl, the 27th March 2025: Vawiin khan Chief Minister Pu Lalduhoma chuan Mizoram Legislative Assembly Annexe Conference Hall ah Former Legislators Association of Mizoram (FLAM) General Body Meeting a hmanpui.

Chief Minister chuan, Candidate chan pawh hi a har viau thin a, candidate zinga a tam zawk fe hi an tla leh a, mipui thlantlin nih hi thil awlsam a ni ngai lo. Chuvang chuan FLAM member te hi in vannei a, Pathian malsawmna in dawng a ni. Rambuai avangin kum sawmhnih zet hmasawnna hna kalpui hlei thei lovin Mizoram hi kan awm a. Chu ti chung chuan vawiinah hian hmasawn chak pawl tak state kan ni. Hei hi kan MLA lo ni tawh thin te thawhrim rah a ni.

Mizoram hi Assembly Session Live telecast hmasa pawl kan ni a. Kan senior te, mawi tak leh zahawm taka House-a in lo awm thin vangin vawiin thlengin MLA ni lai te nungchang pawh a mawi zui zel niin ka hria. Tun hnaiah hnam dangte tihdan tha lo entawn kan ching tan a. Lim inhalsak te ka ching ve tan ta. Hetiang hi tha lo ka ti a, kristian kan nih anga kan tih atana mawi tak leh kan tih vea mawi lo hi a awm, kan thliar thiam a tha hle.

In hamthatna thuah theihtawp kan chhuah a, kan hriat angin tun Session-ah khan in MR Bill amendment kan han pass a. Ka lawmpui che u a ni.

FLAM members te an taksa leh rilru hriselna vawng tha a, rei tak dam turin duhsakna a hlan a. Kum lamah lo upain, in taksa te chu lo chak lo hle tawh mah se, ram leh mipui tan tih theih in la nei a, thangtharte hnenah kawng dik min kawhhmuh zel ula. Keini MLA ni lai te pawh hi inthlahrung hauh lovin thurawn tha pe fo rawh u, tiin a sawm.

Chief Minister hian Prof JV Hluna lehkhabu ziak pahnih a tlangzarh nghal a ni.

President Pu Liansuama pawhin thusawiin, Mizoram sawrkarin MR bill tha zawk a siamsak avangin an lawm hle tih a sawi a. He thil hi hun rei tak kan lo beisei tawh thin a, hmu mai dawni kan inngai a, kan hmu mai thei thin si lo va. Chief Minister Pu Lalduhoma hnenah kan thlen a, rang takin min chinfelsak ta a ni, a ti. FLAM President hian tun laia thalai thi tam lutuk pumpelhna kawng zawn a tul hle nia an ngaih thu leh a theih ang anga hma la tura sawrkar an beisei thu a tarlang a. Naupangte hnena nasa zawk a zirtir a tul nia an ngaih thu a thlen a ni.

FLAM hi kum 1994 a din a ni a, tunah hian member 117 leh associate member (ex MLA/MP te an thih hnua an aiawh an nupuite) 59 an awm mek. An zinga pahnih Pi Rothangi w/o Ch. Chhunga leh Pi Nghakliani w/o Lalrinliana Dawrpui te chuan kumin hian kum za an tling a, chawimawina an hlan a ni.

Mizoram UT inthlan hmasa ber 1972 -a tling mi 30 leh nominated member 3 te zing atangin mi pasarih (7) an la dam a, an zinga pathum ten vawiina an meeting hi an la telpui thei a ni. Kum 2024-25 chhungin an member pathumte an boral a, chungte chu Pi Lalzarliani Hmar w/o Pu Biakchhunga, Pi Pangkungi w/o Pu H. Lalsangzuala leh Pu Kapoor Chand Thakuri (1972 MLA nominated) te an ni.

Sawrkara an lo dil thin tawh angin Mizoram State Assembly Budget Session hnuhnung ber khan March ni 17 khan Ex-MLA te hamthatna, The Mizoram Salaries, Allowances and Pension of Members of the Legislative Assembly (Amendment) Bill, 2025 chu a pass a, an Medical facility- a an vah velna senso bill theih loh ni thin kha paih a ni. 

Inkhawm hi Prof JV Hluna, Vice President in a kaihruai a, Upa H. Liansailovan hunserh hmangin, an member thite sunna Pu John Rotluangliana, General Secretary kaihhruaiin an hmang a, General Secretary Pu TC Pachhunga leh Treasurer Pu Rochhunga Ralte ten report an pe bawk.

Pu K. Liantlinga, General Secretary chuan lawmthu sawiin inkhawm a khar a ni.