Nimin khan Chief Minister Pu Lal Thanhawla chuan Government Champhai College in college te tehna NAAC Accreditation a Grade B++ an hmuh lawmpuina programme an College Multipurpose Hall ah an buatsaih chu khuallian niin a hmanpui.

Chief Minister Pu Lal Thanhawla chuan Government Champhai College in zirna in sang zawk te endikna tehfung NAAC Accreditation Second Cycle ah Grade B++ an hmu chu a lawmpui thusawiin hemi atan ngawrh taka thawktu Principal, zirtirtu leh zirlai naupangte te hi ka lawmpui che u a, tun aia dinmun sang leh tha zawka inhlangkai turin zirtirtu leh zirlai naupangte hi theitawp chhuaha tan la turin ka chah duh che u a ni, a ti a. B++ an hmuh hian college changtlung tak ani nih tih a pholang a ni, a ti bawk a. Zirna in tha nei turin ruhrel(infrastructure) leh zirna boruak (academic atmosphere) tha neih a pawimawh a, zirna pawimawh zia hria in Sawrkarin zirna tihhmasawn nan leh zirlai ten zirna ziktluak an neih theih nan kawng hrang hrangin a thei ang angin theitawp a chhuah mek thu a sawi. Mizoram Sawrkar in zirna pumpui hawlkima Education Reforms Commission a din chu state anga a hmasa pawl anih thusawiin Commission in rawtna an siamte ti hlawhtling vek turin sum leh pai thahnem tak mamawh a ni a, heti chungin kan phak tawk angin rawtna an siamte hlenchhuak turin hma kan la zel a ni, a ti.

Chief Minister chuan Sawrkarin thalai leh zirlai te hmakhua ngaiin thalai te tan khawvel thar a buatsaih mek thusawiin hemi kawnga peng pakhat - NCC hi thil tangkai leh tha a nih tih hriain uar zawka NCC kalpui anih theih hma lak mek anih thu a sawi a. Aizawl ah NCC Academy leh North East Air Wing Headquarters te dinna tur leh Lunglei ah NCC Battalion dang pakhat dah belhna tur te chu NCC hotuten rem an tih tawh thu a sawi a. Tunlai khawvelah zirlai te tan Skill Development leh Computer Applications a bik takin a pawimawh thu thusawi langin Sawrkarin Skill Development Council a din tawh a, Skill Development Institute din a nih theih nan buatsaihna a lak mek tih a sawi. Mizoram Youth Commission kaltlangin thalai te tan eizawnna kawng lamah hmalakna hrang hrang neih mek anih thusawiin hei hi thalai ten an tangkaipui hle a, Mizoram pawmna thalai sang telin ei an zawn mek a ni, a ti. Chhingchhipa Sainik School chu nakuma tan tum anih thu sawi langin India a hmeichhe luh theina Sainik School hmasa ber ni turin tan lak tum a ni a, ti. College hrang hranga a computer applications zirna hawn belh zel thu leh ICT Department kaltlanga Digital World atan tan lak mek thu te a sawi bawk.

Champhai College in Spoken English, Hindi leh Burmese class an kalpui mek chu tha a tih thusawiin heng tawng te hi kan tawng a nilova mahse kan thiam dan ang angin kan hmang mai tur a ni a, Sap tawng kan zah lutuk avanga kan hman duh lohna leh Hindi kan hmusitna te kan dah that a ngai a, heng tawng te hi thalai te tan a bik takin thiam a pawimawh zual a ni, a ti. Sawrkar emaw, khawtlang emaw anga college din belh chu tha a tih loh tih sawiin tunah college kan neih hi a tawk viau tawh a, college nei teuh si mahse zirlai chhawrtlak leh hmantlak loh kan chherchhuak palh ang tih a hlauhthawn awm a, a awmsa te hi changtlung leh phuisui zawka zirlai te mamawh phuhru turin kan buatsaih leh kan enkawl a pawimawh a ni, a ti.

College Accreditation lawmna programme ah hian Prof. Lalnunmawia, Principal chuan inlawmna thusawiin Pu Zirsangliana Paite, Asso. Prof in NAAC inspection chungchangah report a tarlang a ni.

Government Champhai College hi kum 1971 a din niin tunah hian zirlai naupang 650 chuang an nei mek a, zirna subject Department 14 neiin zirtirtu 52 an awm mek a ni. NAAC Accreditation First Cycle hi kum 2004 khan college hian an lo paltlang tawhin B grade a hmu a, Second Cycle Accreditation hi kumin August khan ni thum chhungin NAAC Peer Team ten endikna neiin B++ grade an hmu a ni. Champhai College ah hian Arts, Science, Commerce leh Computer Applications zirna a awm mek a ni.