Horticulture Department hnuaia Technical Officer leh staff te chuan vawiin khan Aijal Club-ah meeting neiin, report pek leh paper zirhona neiin hun an hmang a. Chief Minister Pu Zoramthanga, Horticulture Minister chuan he meeting hi telpuiin, thawktute fuihna thu a sawi.

Chief Minister Pu Zoramthanga chuan state hmasawnna tura hmalakna puiah chuan horticulture chu a innghah tamna ber zing a mi a nih thu a sawi a. Leilung tha, ruahtui tamna, sik leh sa nuam tak, thlai leh thei, thing leh mau in an ngeih em em ram, lehkhathiam tamna, ram ralmuang a cheng kan nih hi kan hman tangkai thiam a tul a ni, a ti a. Ram hmasawn tur chuan a chhung a cheng ten ngaihtuahna dik kan put a tul a ni, a ti. Chief Minister chuan Horticulture Department kaltlanga mumal taka hmalak thin chu lawmawm tiin, a aia ngawrh leh huapzau zawka kalpui a, ei chawp leh kham khawp chauh thar lova, hralhchhuah a sum a chantir than thar tum a, chumi atana ngaihtuahna seng turin Horticulture Department thawktute chu a sawm a ni.

Vawiin inkhawm hi Dr. Elizabeth Saipari, Director of Horticulture chuan kaihruaiin, Pu Rodney L. Ralte, Horticulture Department Secretary chuan thu sawi bawkin, Joint Director Pu Vanlalruata Chenkual hnen atangin kum kaltaa department hma lo lak tawhna hrang hrang leh hmachhawp te ngaihthlak a ni. Meeting hi session thumah then niin, session hnih naah hian Mau, Dragon fruit leh off-season thlai kui dan chungchang paper zirho a ni a, session thum naah division hrang hrang atangin report ngaihthlak a ni bawk.
 
Horticulture Department hian Mission for Development of Integrated Horticulture (MIDH), Rashtrya Krishi Vikas Yojana (RKVY) leh Pradhan Mantri Krishi Sinchayee Yojana (PMKSY) te chu sawrkar laipui hmalakna lian a kalpui mekte a ni a. MIDH hnuaiah hian huan siam thar te, rejuvenation of senile plantation te, ruahtui khawl a tui kawng siam te, farmer training te leh a dangte kalpui thin a ni. RKVY hnuaiah hian micro irrigation (sprinkler leh drip irrigation) te hmalak a ni. RKVY kaltlangin Mizorama Centre of Excellence pathumah farmer-te tan training lo kalpui tawh a ni bawk.