911/2025-2026

Aizawl the 25th June 2025: Vawiin khan Govt. Of India, Ministry of Culture kaltlanga vawiin atanga hman tan Samvidhan Hatya Diwas (Constitution Murder Day) chu Art & Culture bultumin Vaivakawn Cultural Centre-ah hman a ni a. Chief Minister Pu Lalduhoma chuan khuallian niin a hmanpui. Pu C. Lalsawivunga, Minister, Art & Culture chu khualzahawm a ni.

Thu a sawinaah Chief Minister chuan, Samvidhan Hatya Diwas hi Politics-a inbeihna hmanruate pawh a ang thei a. Nimahsela, keini chuan Democracy tun din leh ram Danpui humhalh a tulzia hriat thar nan kan hmang a ni.

India danpui hnuaiah kan hnam leh sakhuate humhimna fel tak a awm a, ILP kan nei bawk a, India sawrkar hnuaiah hian Zofate hi kan him a ni – tiin ka sawi thin a. Article 371G ah kan inhumhimna (special provision) fel taka dah a ni a, Eastern Bengal Frontier Regulation Act 1873 hmangin Inner Line Regulation leh non tribal ten kan ramah ram an neih ve theih lohna a awm bawk a. Danpuiin min humhim tlat avang leh democracy lungphum – zalenna – kan neih avangin he ramah hian kan him a ni, kan ti mai a ni. Kan himna leh him lohna chu kan Danpuiah a innghat a. He dan hi palzut a nih chuan engkim a lo derthawng nghal mai ang. Tin, 6th scheduled, kan tana tha em em kha kan ADC pathumah chauh a lo nung ta si a. Tih nun thar leh a tha lawm ni tia inrawnkhawm te hi a tha hialin ka hria, a ti.

Chief Minister hian, ram danpui hi tihdanglam theih loh a ni lo va, vawi thlengin vawi 106 vel Amend tawh a ni. Amend theih Danpui a nih miau avangin, a tha zawnga hman theih a ni a, kum 1975-a Emergency puanna thu “Internal disturbance” tih pawh “Armed Rebellion” tia thlak (Amend) niin a tha em em a ni. Amaherawh chu amend theih a nihna hi a chhe zawnga hmang duh ruling party an lo awm erawh chuan kan himna hi tihchhiat theih a ni.

Tuna sawrkar mek hian kum 1975 a emergency lo puan tawh ang kha an duh lohzia lantirna he Diwas hi a hmang a ni a. Kan ram danpui leh democracy tundin an duhzia an tilang a ni. Chutiang rilru pu an nih avang chuan ngaihngamin kan awm thei ang. Amaherawh chu kan mit leh beng kan chhit reng erawh chu a ngai thung. Kan zirlaite leh thangtharten kan ram leh hnam himna hi engtik lai mahin kan ngaihthah tur a ni lo, tiin a chah.

Khuallian hian ILP khauh zawka kalpui a nih tur thu pawh a tarlang a ni.

Khualzahawm Pu C. Lalsawivunga, Minister, Art & Culture pawhin thusawiin India danpui chu kan rama dan chungnung ber a ni a. Sawrkar lam leh mipui lam atangin mawhphurhna a awm ve ve a. Kan danpui hnuaia kan mawhphurhna te tha taka kan zawm a, hnam tinte him tak leh inngeih taka kan awm dial dial hian kan ram hi a mawiin a lo ropui zual a ni, a ti.

Pi Zodingpuii, Secretary, Art & Culture chuan kal khawmte lawmna leh he ni hmang tura sawrkar laipuiin a duh dan te a sawifiah ve bawk. He Diwas hi kum khat chhung hman tur a ni.

Kum 1975 June ni 25 khan khatihlaia India Prime Minister Pi Indira Gandhi chuan Internal Disturbances chhuanlamin Article 352 hnuaiah Emergency a puang a. Thla 21 zet a awh a. Kumin hi a kum 50 na cham niin central sawrkar chuan hetianga hmang tur hian ruahmanna a rawn siam ta a ni.

Inkhawm hi Pi Carol VLMS Dawngkimi, Director, Art & Culture chuan lawmthu sawiin a khar a ni.